दाङ : दाङको तुलसीपुरमा रहेको तरकारी बजार शिल गरिएको छ । तुलसीपुर उपमहानगरपालिका वडा नम्वर ६ मा रहेको तरकारी तथा फलफुल बजारमा भारतबाट ल्याइने तरकारी तथा फलफुलको अयात नरोकिएपछि स्थानीय सरकारले बजार नै शिल गरेको हो ।
मंगलबार बिहान गएको अनुगमन टोलीले भारतबाट अबैध रुपमा तरकारी तथा फलफुल नियमित रुपमा भित्रिइरहेको र त्यही तरकारी फलफुल बिक्रि वितरण भएको पाइएपछि बजार नै शिल गरिएको उपभोक्ता हित संरक्षण शाखा तुलसीपुरका प्रमुख रेवा रावतले बताइन् ।
तुलसीपुर उपमहानगरपालिका उपभोक्ता तथा हित संरक्षण शाखा, तुलसीपुर उद्योग वाणिज्य संघ, प्रशासन, प्रहरी, उपभोक्ता अधिकार अनुसन्धान मञ्च दाङ, लगायतको संयुक्त अनुगमनबाट भारतबाट अवैध रूपमा भित्रिएको तरकारी र फलफुल बिक्रिमा रोकसमेत लगाइएको छ । भारतीय सामान खुलेआम ल्याउने मनोज फ्रुट सेन्टर र सापकोटा तरकारी पसलका सञ्चालकलाई नियन्त्रणमा लिएर कोरोना क्यारेन्टाइनमा पठाइएको छ । भने पसल पूर्णरूपमा शिल गरिएको छ ।
कोरोना संक्रमणको प्रकोप बढिरहेको समयमा भारतबाट कुनै पनि प्रक्रिया पूरा नगरेर गाडी ल्याउने गरिएको तुलसीपुर उद्योग वाणिज्य संघका अध्यक्ष विरबहादुर रावतले जानकारी दिए । उनले स्थानीय सरकारले सर्वपक्षीय भेला राखेर भारतबाट तरकारी ल्याउन बन्द गर्ने भन्ने निर्णय गरे पनि त्यसको अवज्ञा गरेकाले र सुरक्षा आवश्यक भएकोले सरकारी निर्णयमा संघ लागेको बताए । उनले अबैध र अनाधीकृत रुपमा आउने यस्ता सामग्री आयातमा रोक्नु पर्ने र आवश्यक परे कारवाहीसमेत गरिनु पर्ने बताए । उनले बजारमा भारतबाट आएको तरकारी र फलफुलका पसल शिल गर्नुपरेको बताए ।
उनले गाडी चालकबाट पनि संक्रमण हुने सम्भावनालाई मध्यनजर गरेर यस्तो कदम उठाइएको जानकारी दिए । 'हरेक दिन तरकारी बजारमा ५ वटासम्म भारतीय गाडीले तरकारी ल्याउने गरेको पाइएको छ । तरकारी जस्तो अत्यन्त संवेदशील कुरामा यस प्रकारको लापरवाही राम्रो होइन', अध्यक्ष रावतले भने, 'पहिलो चरणमा तरकारी बजार ३ दिनसम्मका लागि बन्द गरिएको छ भने दुई पसल पूर्णरुपमा शिल गरिएको छ ।' रावतले स्थानीय वजारमा प्रसस्त तरकारी आउने भए पनि त्यसको बेवास्था गरेर अहिलेको अवस्थामा पनि भारतबाट तरकारी ल्याउन असुरक्षित भएको बताए ।
तरकारी तथा फलफुल बजारका अध्यक्ष यादव देवकोटाले समितिले केहि दिन अघि नै निर्णय गरेर भारतीय तरकारी र फलफुल यो अवस्थामा नबेच्ने निर्णय गरिसकेको भए पनि केहि व्यवसायीले अटेरी गरेको बताए । उनले अहिले यसलाई न्यूनीकरण गर्नतर्फ लागेको बताए ।
स्थानीय व्यवसायीहरुले भने आफूहरुले भारतीय समान ल्याइरहेका बताएका छन् । उनीहरुले स्थानीय उत्पादनले बजार आवश्यकता पूरा नगर्ने भएर नै भारतीय तरकारी र फुलफुल ल्याएको बताए ।
भारती तरकारी र फलफुल बिक्री गरेको भन्दै सापकोटा तरकारी पसल र मनोज फ्रुट हाउसका सञ्चालकलाई कारवाही गरिने भएको छ । सञ्चालक दुबैलाई संक्रमणको आशंकामा तुलसीपुरको क्वारेन्टाइनमा लगिएको जनस्वास्थ्य निरीक्षक विमल केसीले जानकारी दिए । यसैबीच भारतबाट अवैध ढंगले तरकारी ल्याउने गाडी चालक र बिक्रेतालाई पनि क्वारेन्टाइनमा राखिएको छ । उनीहरुले तरकारी कसरी ल्याए भन्ने बारेमा अनुसन्धान भइरहेको उपभोक्ता हित संरक्षण शाखा अधिकृत रेवा रावतले जानकारी दिइन् । वडा नम्वर ५ मा रहेको साझा बजारमा पनि अनुगमनका क्रममा भारतीय तरकारी प्रसस्त मात्रामा भेटिएपछि त्यहाँ पनि शिल गरिएको छ ।
प्रतिक्रिया दिनुहोस !
