बैतडी : बैतडीमा ६ सय जनाको कोरोना रिपोर्ट नेगेटिभ आएको छ । भारत तथा अन्य ठाउँबाट भित्रिएर क्वारेन्टाइनमा बसेकाहरुको कोरोना चेकजाँच गर्दा रिपोर्ट नेगेटिभ आएको स्वास्थ्य कार्यालयका प्रमुख योगेशप्रसाद भट्टले बताए । गत चैत २८ गते थ्रोट स्वाब संकलन गरिएका ४२८ जनामध्ये ४१९ जनाको कोरोना रिपोर्ट नेगेटिभ आएको र बाँकी ९ जनाको पुनः परीक्षण गर्नुपर्ने देखिएको उनले बताए ।
यस्तै विभिन्न स्थानीय तहमा क्वारेन्टाइनमा बसेका १८१ जनाको र्यापिड डाइग्नोस्टिक टेस्ट गर्दा उनीहरुको रिपोर्ट नेगेटिभ आएको स्वास्थ्य कार्यालयका कोभिड १९ सम्पर्क व्यक्ति भुवनप्रसाद जोशीले जानकारी दिए । उनले भने, 'हामीले थ्रोट स्वाब संकलन नभएका ठाउँमा आरडीटी गरेर कोरोनाको चेकजाँच गरेका छौं । यो जाँचबाट सबैको रिपोर्ट नेगेटिभ आएको हो।'
जिल्ला अस्पताल बैतडीमा अहिलेसम्म २० जनाको कोरोना चेकजाँच गरिएकोमा सबैको रिपोर्ट नेगेटिभ भएको अस्पतालका प्रमुख डाक्टर बसन्तराज जोशीले जानकारी दिए । जिल्लाको पुर्चौंडी नगरपालिका ३४३, शिवनाथ गाउँपालिकाका १२, मेलौली नगरपालिकाका ४ र पञ्चेश्वर गाउँपालिकाको क्वारेन्टाइनमा बसेका ६६ जनाको थ्रोट स्वाब संकलन गरिएको र उनीहरु सबैको रिपोर्ट नेगेटिभ आएको हो । 'थ्रोट स्वाब संकलन गरिएका सबैको राष्ट्रिय जनस्वास्थ्य प्रयोगशालामा चेकजाँच गरिएको हो । त्यो रिपोर्ट अनुसार सबैको कोरोना रिपोर्ट नेगेटिभ आएको छ । यो खुसीको कुरा हो,'स्वास्थ्य प्रमुख भट्टले भने।
यस्तै दशरथचन्द नगरपालिकाका २१, सुर्नया गाउँपालिकाका ४२, दोगडाकेदार गाउँपालिकाका २०, डिलाशैनी गाउँपालिकाका ५०, पाटन नगरपालिकाका ४ र सिगास गाउँपालिकाका २४ जनाको आरडीटी गर्दा सबै रिपोर्ट नेगेटिभ आएको हो ।
यस्तै अझै पनि १७७ जना जिल्लाका विभिन्न क्वारेन्टाइनमा बसीरहेका र उनीहरुको १४ दिन पुगेपछि र्यापिड डाइग्नोस्टिक टेस्ट गरिने स्वास्थ्य कार्यालयले जनाएको छ ।
प्रतिक्रिया दिनुहोस !
