दाङ : लकडाउनका कारण गन्तब्यमा पुग्न नसकेर बाटोमै अलपत्र परेकालाई यहाँका विभिन्न संघ सस्था र व्यवसायीले सहयोग गरेका छन् । उनीहरुले बाटोमा अलपत्र परेका यात्रु र नागरिकहरुलाई निशुल्क खाना खुवाउने र गन्तब्यसम्म पुर्याउने काम गरेका हुन् ।
विगत केहि दिनदेखि तुलसीपुर उद्योग वाणिज्य संघको अगुवाइमा तुलसीपुरमा क्रियाशील युवाहरुका संघसस्था र यातायात व्यवसायीहरुले यस्तो मानवीय कार्यलाई अगाडि बढाएका छन् ।
चैत ५ गतेदेखि हालसम्म १३ सय ६२ जनालाई भोजन, बास र यातायताका व्यवस्था गरिएको व्यवस्थापनको जिम्मा पाएका युवा व्यवसायी विनिल केसीले बताए । उनले सबैको समन्वय र परिचालनबाट व्यवस्थित रुपमा अलपत्र यात्रुको उद्दार र व्यवस्थापन गरिएको बताए ।
साविक राप्ती अञ्चलका जिल्लाहरुको मुख्य ट्रान्जिट रहेको दाङको तुलसीपुरको अवस्था देखेर मानवीय नाताले तुलसीपुर उद्योग वणिज्य संघको संयोजन र अगुवाईमा अलपत्र यात्रु र नागरिकहरुलाई गाँस बास र कपासको व्यवस्था गरिएको तलसीपुर उद्योग वाणिज्य संघका निवर्तमान अध्यक्ष विमल रिजालले बताए । उनले यसमा स्थानीय सरकारले विशेष रुपमा चासो दिनु पर्ने बताए । व्यवसायीहरुले मानवीय नाताले यो कार्य गरिरहेको उनको भनाइ छ ।
निशुल्क रुपमा खाना, बस्न र घरसम्म पुग्ने व्यवस्था भएर यात्रु खुसी भएका छन् । उनीहरुले बाटोको भोको यात्रालाई तुलसीपुले अन्त्य गरिदिएको बताएका छन् । रुकुमका धनबहादुर परियारले आफू निर्माण श्रमिक भएको र धादिङमा अलपत्र भएपछि उद्दार भएर दाङसम्म आएको बताए । उनले आफूहरु एउटै गाउँका १३ जना रहेको बताए ।
प्रतिक्रिया दिनुहोस !
