बझाङ : नेपाल र भारत दुवै देशमा लकडाउन भएपछि बैतडीको झुलाघाट र दार्चुलाको महाकाली पारि रोकिएका नेपालीलाई बिहीबार नेपाल प्रवेश गराएपछि सम्बन्धित स्थानीय तहका प्रमुखले बुझेर ल्याएका छन् । महाकाली पारिका नेपाली वारि आएपछि स्थानीय तहले रिर्जभ गरेर बझाङ ल्याइएको हो ।
बझाङको बुंगल नगरपालिका , वित्थडचिर गाउँपालिका,सुर्मा गाउँपालिका केदारस्यूँ गाउँपालिकामा रहेका स्थानीयलाई उद्धार गरि ल्याइएको हो । बुंगल नगरपालिका, बित्थड चिर गाउँपालिका , केदारस्यूँ गाउँपालिकाका प्रमुखहरु एक सातादेखि दार्चुला र बैतडीमा कुरेर बसेका थिए । स्थानीय तहका प्रमुखले बैतडीको झुलाघाँट नाका र दार्चुलाबाट बसको व्यवस्था मिलाइ आफ्ना स्थानीय तहका स्थानीयलाई शुक्रबार गाउँ लिएर आएका हुन् ।
महाकाली पारि भारतको क्वारेन्टाइनमा रहेका नेपाली केन्द्र सरकारको पहलमा नेपाल छोड्ने जानकारी पाएपछि बैतडीको सिमानामा आएका थिए। बुंगल नगरपालिकाका प्रमुख धनबहादुर बिष्टले नगरपालिकाको लागानीमा ५ वटा बस रिजर्भ गरी स्थानीय तहले स्थानीयलाई ल्याएको बताए।
त्यस्तै जिल्लाको बित्थड चिर गाउँपालिकाका १०० जना, बुंगल नगरपालिकाका ३ सय ७४ जना, केदास्यू गाउँपालिकाका २१ जना, सुर्मा गाउँपालिकाका ६ जना गरी ५ सय ६ जनालाई उद्धार गरी ल्याइएको हो ।जिल्ला ल्याइएका सबैजनालाई स्वास्थ्य परीक्षण गरी १४ दिन क्वारेन्टाइनमा राखिने बताइएको छ । यस अगाडि ६२ जना क्वारेन्टाइनमा रहेका थिए ।
प्रतिक्रिया दिनुहोस !
