बझाङ : बझाङको थलारा गाँउपालिका घर भएका ९३ जना भारतको रामपुरमा रोकिएका छन् । उनीहरु त्यहाँ रोकिएको ३५ दिन भएको छ । अलपत्र पर्नेमा १३ जना महिलासहित अन्य बालबालिका वृद्धवृद्धा छन् । क्यारेन्टाइनमै एक जना महिला दुई हप्ता अगाडी सुत्केरी भएकी थिइन् ।
भारतको विभिन्न क्षेत्रबाट घर आउन हिँडेका उनीहरु नेपाल भारत लकडाउ भएर आवत जावत बन्द गरेपछि त्यहाँ प्रहरीले रोकेको हो । रामपुरको एक सार्वजनिक घरमा बनाएको क्यारेन्टाइनमा राखेका उनीहरुलाई त्यहाँको प्रहरी प्रशासनले सामान्य पुरी खान दिए पनि बस्न खान साह्रै समस्या भएको त्यहाँबाट भरत थापाले जानकारी दिए ।
उनले भने, 'हामीलाई धेरै दुख भएको छ। आइमाइ केटाकेटी छन् खान बस्न छैन। कहिले खुल्ला के होला यस्तो के आइपर्यो भनेर सबको मन रोएको छ । हाम्रो उद्धार गरिदिनुहोस् ।'
उनीहरुले बाथरूमको पानी खानेगरेको खान बस्न र मानसिक तनावले धेरैको स्वास्थ्य समस्या भएको दुखेसो राखेका छन् । त्यहाँको प्रहरीले पनि अपमान गर्ने गरेको र प्रहरीले तिम्रो सरकारले उतैबाट नछोड्नु भनेकाले नछोडेको भन्ने गरेको उनीहरुले बताए।
'त्यहाँ रोकिएका सबै थलारा गाँउपालिकाको दंगाजी पाराकाट्ने र कोटभैरमा घर भएका मान्छेहरु हुन् । यहाँको दुख समस्या धेरै छ', टेलिफोनमार्फत अम्मर थापाले भने, 'सरकारले पहल गरेर हामी छिटो नेपाल आउन पाँऊ । भारतमा थप लकडाउन बढाएपछि उनीहरु झन निरास भएका छन् ।'
बैतडी र दार्चुला नाकामा रोकिएकालाई नेपाल जान दिएपछि रामपुरमा रोकिएकाले पनि आफूहरुलाई नेपाल आउनका लागि पहल गरिदिन टेलिफोन फेसबुकमार्फत नेपाल सरकार जनप्रतिनधि अगुवालाई आग्रह अनुरोध गर्दै आएका छन् ।
थलाराका रामपुरमा रोकिएकले थलाराका जनप्रतिनिधिहरुले आफूहरु नेपाल फिर्ता गर्नका लागि कुनै पहल चाँसो नगरेको दुखेसो राखेका छन् । त्यहाँ रोकिएका अम्मर थापाले भने, 'स्थानीय जनप्रतिनधिसँग धेरै पटक फोन गरेर समस्या दर्शायौँ तर सुनुवाइ गरिदिएनन् ।'
थलाराका स्थानीय काँग्रेसका नेताहरु मानबहादुर कडायत सूर्यप्रकास जोशीले पहल गरिरहेको बताए । तर स्थानीय सरकारबाटै पहल कम भएकाले उनीहरुले आउन नसकेको उनीहरुको भनाइ छ ।
प्रतिक्रिया दिनुहोस !
