तनहुँमा आइसोलेसनको क्षमताभन्दा बढी संक्रमित
दमौली : पछिल्ला दुई दिनमा लगातार संक्रमितको संख्या बढेर तोकिएका आइसोलेसनले नथेग्ने अवस्था आएपछि तनहुँमा स्थानीय तहमै उपयुक्त ठाउँलाई आइसोलेसनका रुपमा प्रयो गरिने भएको छ ।
तनहुँको बेलचौतारास्थित जीपी कोइराला राष्ट्रिय स्वासप्रस्वास केन्द्रको आइसोलेसनमा अहिले १० जना छन् । २० जना क्षमता रहेको जीपी कोइराला राष्ट्रिय स्वासप्रस्वास केन्द्रको आइसोलेसनमा हाल १० जना छन् । दमौलीमा रहेको दमौली अस्पतालको आइसोलेसनमा आठ जना क्षमता भए पनि १५ जना बसिरहेका छन् । यस्तोमा घिरिङ गाउँपालिकामा १७, ऋषिङ गाउँपालिकामा २१ अनि व्यास र शुक्लागण्डकी नगरपालिकामा दुई-दुई जनामा पोजिटिभ देखिएपछि उनीहरुलाई राख्नकै लागि तत्काल स्थान अभाव देखिएको छ ।
यसअघि घिरिङका १७ जनालाई जीपीको आइसोलेसनमा राख्ने भनिए पनि फेरि ऋषिङमा पनि ठूलो संख्याका संक्रमित देखिएपछि उनीहरुकै लागि राख्ने ठाउँ अभाव देखिन लागेकाले झनै थपिने अवस्था कठिनाइपूर्ण हुने प्रशासनको अनुमान छ । यसै आधारमा अब देखिने संक्रमितलाई आफ्नै तहमा आइसोलेसन बनाएर राख्नका लागि कोभिड कमाण्डले सुझाव दिएको छ । ऋषिङ र घिरिङमा धेरै संक्रमित देखिंदा र पानी परिरहँदा आइसोलेसनमा ल्याउनै कठिन हुने भएकाले यस्तो विकल्प अघि सार्न लागिएको हो ।
शुक्रबार प्रशासनले घिरिङका संक्रमित लिन पठाएको मिनीबस बाटो खराब रहेको भन्दै बीचबाटै फर्केको थियो । यातायातको सहजता र ठाउँ अभाव दुवैका आधारमा तहगत रुपमै व्यवस्थापनको तयारी प्रशासनले गर्न लागेको हो । ‘संख्या बढिरहँदा र भएको पूर्वाधार कम भएकाले स्थानीय तहका उपयुक्त ठाउँलाई नयाँ आइसोलेसन बनाउन लागेका हौं,’ प्रमुख जिल्ला अधिकारी बद्रीनाथ अधिकारीले अन्नपूर्णसँग भने,‘अब ऋषिङ र घिरिङका संक्रमितलाई त्यहीं आइसोलेसन तयार पार्छौं ।’ तर घिरिङ १का वडाध्यक्ष गंगा कुमालले भने आइसोलेसन बनाउने हो भने मापदण्ड पूरा गरेर मात्र गर्नुपर्ने माग गरे । ‘मापदण्ड पूरा नगरी गर्दा थप जोखिम आउन सक्छ,’ उनले भने ।
जीपीमा ८० क्षमताको आइसोलेसन बनाइने, व्यासले पनि आइसोलेसन भवन थप्दै
दुई साताअघि संकलित नमूनाको नतिजामा धमाधम पोजिटिभ आउन थालेपछि तनहुँमा शनिबारसम्म पोजिटिभ देखिनेको संख्या ६८ पुगेको छ । तीमध्ये दुई मात्र निको भएर घर फर्किएका छन् । नतिजा आउन बाँकी संख्या झण्डै पाँच सय रहेको अवस्थामा आइसोलेसनको क्षमता बढाउनुपर्ने मुख्य चुनौती स्थानीय तहसँग छ ।
यसै आधारमा जीपी कोईरालाको आइसोलेसनलाई ८० जना अट्ने बनाउन लागिएको छ । तर त्यसका लागि केही दिन लाग्न सक्छ । ‘ठाउँ हाम्रा लागि छ तर ठूलो संख्यामा थप्नका लागि तयारी गर्न कम्तिमा साता दिन लाग्छ,’ केन्द्रका प्रमुख डाक्टर रामकुमार श्रेष्ठले भने । उनले तत्काल करिब २० जना अटाउन सकिए पनि अरुका लागि थप्न समय लाग्ने बताए । प्रमुख जिल्ला अधिकारी अधिकारीले नजिकैको वृद्धाश्रमका वृद्धवृद्धालाई अन्यत्र सारेर आइसोलेसनको क्षमता थप्ने तयारी गरिएको बताए । ‘अस्पतपालका खाली ठाउँ र वृद्धाश्रम उपयोग गरेर आइसोलेसनको क्षमता बढाउँछौं,’ उनले भने ।
ऋषिङ गाउँपालिकाले पनि शिव सरस्वती माविलाई आइसोलेसनका रुपमा विकास गर्ने योजना बनाएको छ । प्रशासनले ऋषिङका लागि दमौली र घिरिङका लागि भीमादबाट चिकित्सक पठाउने बताएको छ ।