नुवाकोट : नुवाकोटको पूर्वी भेगमा रहेको वेलकोटगढीमा पहिरोले घर बगाउँदा एक वृद्धको ज्यान गएको छ ।पहिरोले दुइपीपलमा दलित बस्ती बगाएको छ भने ६० घर उच्च जोखिममा रहेका छन् ।
वेलकोटगढी नगरपालिका ८ हर्रे पिर्यनडाँडामा शुक्रबार पहिरोले घर बगाउँदा ६८ वर्षीय अक्कलबहादुर तामाङको घटनास्थलमै ज्यान गएको जिल्ला प्रहरी कार्यालय नुवाकोटले जनाएको छ ।
घरमा एक्लै बस्दै आएका तामाङ बिहान ३ बजेतिर सुतिरहेका बेला पहिरोमा पुरिएर ज्यान गएको प्रहरी निरीक्षक विष्णु फुयालले जानकारी दिए। तामाङको शव पोष्टमार्टमका लागि नुवाकोट जिल्ला अस्पताल त्रिशूली ल्याइएको छ ।
पहिराले वेलकोटगढी नगरपालिका ५ दुइपीपल डवली नजिकै दलित बस्ती बगाएको छ। ६ घर बगाएको छ भने अन्य १२ घर जोखिममा रहेको वडाध्यक्ष अनन्तप्रसाद नेपालले वताए ।
पहिराले स्थानीय कृष्ण वर्देवा, विन्दा वर्देवा, कृष्ण श्रेष्ठ, रामकुमार श्रेष्ठ, पुर्णबहादुर श्रेष्ठ र तुलसीदाश श्रेष्ठको घर बगाएको हो । पहिरो झर्न थालेपछि पीडितहरु भागेर ज्यान बचाएका थिए । स्थानीय नारायण विक, सूर्य विक, प्रदीप विकलगायतका ६० जनाको घर जोखिमपूर्ण अवस्थामा रहेकाले सुरक्षित स्थानमा सारिएको छ ।
प्रतिक्रिया दिनुहोस !
