बर्दियामा बढ्दै कोरोना संक्रमित
गुलरिया : बर्दियामा कोरोना भाइरस संक्रमितको संख्या दिनहुँ थपिन थालेको छ । स्थानीय प्रशासनले पीसीआर परीक्षणको दायरा फराकिलो पारेसँगै कोभिड–१९ संक्रमितको संख्या बढ्न थालेको हो ।
पछिल्लो समय बाँसगढी नगरपालिकास्थित सीजी फुड्समा कार्यरत कामदारहरुमा कोरोना भाइरस संक्रमण देखिएपछि बाँसगढी नगरपालिका सिल गरिएको छ । कम्पनीमा कार्यरत स्थानीय कामदारका घरपरिवार, टोल छिमेक लगायत समुदायस्तरमा संक्रमण फैलिन नदिन नगरपालिकाको अनुरोधमा बाँसगढी नगरक्षेत्रमा सप्ताहव्यापी निषेधाज्ञा जारी गरिएको प्रमुख जिल्ला अधिकारी लिलाधर अधिकारीले बताए ।
संक्रामक रोग ऐन २०२० को दफा २ एवम् स्थानीय प्रशासन ऐन २०२८ को दफा ६ (३) वमोजिम जिल्ला कोभिड–१९ संकट ब्यवस्थापन केन्द्र बर्दियाको वैठकको निर्णयबाट पालिका भित्र सूचना मार्फत निषेधाज्ञा जारी गरेका छौं । उनले भने,' निषेधाज्ञा अवधिभर औषधी उपचार, खाद्यवस्तु खरिदलगायत अत्यावश्यक सेवा र काम बाहेक घर बाहिर निस्कन अनुमति दिएका छैनौं ।'
जिल्लामा जोर विजोर प्रणालीमार्फत निजी सवारी साधनहरुलाई आवतजावत गर्न अनुमति दिइएको छ । कोभिडको जोखिमबाट जोगिन अनिवार्य मास्क प्रयोग, भौतिक दुरीसँगै आधारभूत स्वास्थ्य सुरक्षाका मापदण्ड पालना गर्न स्थानिय प्रशासनको निर्देशन छ । सीजी कम्पनीमा संक्रमितको संख्या बढेपछि कम्तिमा एकसाता कम्पनी संचालन नगर्न अनुरोध गरिएको छ । कम्पनीमा कार्यरत अधिकांस महिलाहरुमा लक्षण विहिन संक्रमण देखिएकाले समुदायमा नफैलिएको अनुमान हाम्रो छ प्रजिअ अधिकारीले भने ।
बाँसगढी नगरपालिका क्षेत्रमा संक्रमितका सम्पर्कमा आएका व्यक्तिहरुको नमुना स्वाब लिने काम भइरहेको स्वास्थ्य कार्यालय बर्दियाका प्रमुख गोकर्ण गिरीले बताए । मंगलबार बर्दियामा पुष्टि भएका १८ जना संक्रमित मध्ये १५ जना वाँसगढी नगरपालिका भित्रका छन् । जसमा ५ जना संक्रमितको सम्पर्कमा आएका व्यक्ति छन् । बाँसगढी नगरपालिकामा मात्र संक्रमितको संख्या १ सय ३ पुगेको छ ।
बर्दियामा १० हजार १४७ जनाको पीसीआर परीक्षण भइसकेको छ । गिरीका अनुसार पीसीआर गरिएकाहरु मध्ये ४ सय ३३ जनाको कोरोना भाइरसको नजिता पोजिटिभ आएको छ । जिल्लामा ३ सय २५ जनाले कोरोना जितेका छन् । बर्दियामा एकजनाको कोरोना संक्रमणका कारण मृत्यु भएको छ ।