बर्दियामा कोरोना संक्रमितको संख्या ८ सय नाघ्यो, संक्रमण दर ६ दशमलव ३७ प्रतिशत
असोज २६, २०७७ सोमबार १३:१४:०
गुलरिया : विश्वव्यापी फैलिरहेको कोरोना भाइरस संक्रमितको संख्या बर्दियामा ८ सय नाघेको छ । भेरी अस्पताल नेपालगञ्जमा गरिएको स्वाब परीक्षणको नतिजाअनुसार बर्दियामा कोभिड–१९ संक्रमण हुनेको संख्या दिनानुदिन बढ्दै गएको छ ।
स्वास्थ्य कार्यालय बर्दियाका प्रमुख गोकर्ण गिरीका अनुसार बर्दियामा १२ हजार ५५३ जनाको पीसीआर परिक्षण भइसकेको छ । स्वाब परीक्षणको नतिजा अनुसार संक्रमितको संख्या ८ सय १८ पुगेको छ । संक्रमितमध्ये ६ सय ११ जना निको भएका छन् । बर्दियामा हाल १ सय ७० जना सक्रिय संक्रमित छन् । हालसम्म कोरोनाबाट पाँचजनाको मृत्यु भएको छ। स्वाब नमुनामध्ये २ सय जनाको रिपोर्ट आउन बाँकी छ ।
बर्दियामा ५० भन्दा बढी प्रहरी, २० भन्दा बढी स्वास्थ्यकर्मी, १५ भन्दा बढी व्यापारी र बाँकी अन्य व्यक्तिमा संक्रमण देखिएको छ। जिल्लामा सबैभन्दा बढी क्रमशः बाँसगढी नगरपालिकामा २१४ जना, गुलरिया नगरपालिकामा १४४ जना र मधुवन नगरपालिकामा ११२ जनामा संक्रमण देखिएको छ।
बर्दियाको कुल ४ लाख ७७ हजार जनसंख्या मध्ये २ दशमलव ६३ प्रतिशतको कोरोना भाइरस परीक्षण गरिएको छ । स्वाब परीक्षण गरिएका मध्ये ६ दशमलव ३७ प्रतिशतमा कोरोना पोजिटिभ पाइएको हो ।
गिरीले थपे कुल संक्रमित मध्ये निको हुनेको संख्या ७८ प्रतिशत र मृत्युदर ० दशमलव ६२ प्रतिशत छ । बर्दियामा २१ प्रतिशत सक्रिय संक्रमित छन् । वैदेशिक रोजगारीबाट आउनेहरुको चहलपहल बढ्न थालेकाले संक्रमण अझै बढ्न सक्ने स्वास्थ्य प्रमुख गिरीको चिन्ता छ । लकडाउनका सुरुमा देश बाहिरबाट आउनेहरु स्थानीय तहका एकान्तवासमा बसेर घर फर्कन्थे । हिजोआज सोझै घरजाने परिपाटीले थप चुनौती बढेको हो ।
विद्यालय पनि संचालनको तरखरमा रहेकाले विद्यालयमा बनाइएका अधिकांश क्वारेन्टाइन हटाइएका छन् । हाल बर्दियाका ८ वटै पालिकाका १७ स्थानमा रहेका क्वारेन्टिनमा ९ सय ४२ वटा वेड छन् ।
बर्दियामा ५ सय ७५ जना क्वारेन्टिनमा रहेको स्वास्थ्य कार्यालय बर्दियाले जनाएको छ । संक्रमितको संख्या बढ्दै गएपछि उपचारमा चुनौती बढेको बर्दिया अस्पतालले जनाएको छ ।
प्रतिक्रिया दिनुहोस !
