पानीको मूल फुटेपछि सुकेको दहमा कमल फूल्न थाल्यो (भिडियो)

बर्दिबास : महोत्तरीको बर्दिबास नगरपालिका-४ पञ्चधुरा माइस्थान मन्दिर परिसरमा पानीको मुल फुटेको छ । एक दशकअघि मन्दिरमा रहेको दह सुकेको थियो । अहिले अच्चम लाग्दो तरिकाले मन्दिरबाटै पाँच महिनादेखि भलभल्ती निर्मल पानीको मुल बग्न थालेको पञ्चधुरा माई मन्दिर संरक्षण समितिका अध्यक्ष अकलबहादुर तामाङ्गले बताए ।

‘मन्दिर परिषरमा पाँच स्थानमा पानीको मुल फुटेको छ, 'उनले भने, 'एक ठाउँमा त पञ्चधुरा माईको एेतिहासिक मन्दिरबाटै पानी बगिरहेको छ।' मन्दिर नजिकै रहेको दहमा पानी जम्मा भएपछि हराएको कमलको फूल फुल्न थालेको छ ।

मन्दिरबाटै पानी बग्न थालेपछि हेर्नेको घुइँचो लाग्ने गरेको छ । पर्यटक मन्दिरमा आउन थालेका छन्। वनभोज खानेहरु पनि आउन थालेका छन्। 'बिहान कमलको फूल फुल्ने गरेको छ । मूल र फूल हेर्ने आन्तरिक पर्यटक बढ्दैछन्,' संरक्षण समितिका अध्यक्ष तामाङ्गले भने ।

चुरे क्षेत्रमा पञ्चधुरा माइस्थान पर्दछ । बढ्दै गरेको चुरे विनासले भूमिगत पानीको मूल हराएको चुरे विज्ञ डा. बिजय सिंहले बताए। पछिल्लो समय चुरे संरक्षणमा सबैको चासो बढ्दा चुरेमा सुकेका मूलमा पानी देखिएको उनले बताए ।

पञ्चधुरा माई मन्दिर मधेसको प्रसिद्ध देवी शक्तिपीठमा पर्दछ। पूर्व—पश्चिम राजमार्ग अन्तर्गत महोत्तरीको बर्दिबास चोकबाट २ किलो मिटर पश्चिम उत्तरस्थित वनक्षेत्र छिचोलेर प्राचीन यो देवी शक्तिपीठ परिसरमा पुग्न सकिन्छ ।

करिब तीन बिघा क्षेत्रफलमा फैलिएको मन्दिर परिसरको पुरानो इनार मर्मत गरिएपछि अहिले पानीको राम्रो मूल फुटेको छ । स्थानीयले दहलाई सरसफाइ गरेर छठ पर्व मनाउन जुटेका छन् ।

देशभित्र र भारतको बिहार प्रान्तबाट बाक्लै दर्शनार्थी आउने मन्दिर परिसरमा रहेको खानेपानीको इनार सुकेको थियो। सामुदायिक विकास तथा पैरवी मञ्च बर्दिवास र डिभिजन वन कार्यालयले बैशाख महिनामा सुकेको इनारको उत्खन्न गरेपछि इनारमा पानीको मुल देखिएको थियो । त्यसपछि केही दिनमै मन्दिर परिषरकै दहमै पानी मूल देखिएको डिभिजन वन कार्यालय महोत्तरीका प्रमुख हेमन्त साहले जनाए ।

माईस्थान मन्दिर परिसर वरिपरिका ५३ घरधुरी परिवार र मन्दिरमा आउने दर्शनार्थीको एक मात्र खानेपानीको स्रोत इनार सुक्दा निकै कठिन बनेको थियो । मञ्चले जीर्ण अवस्थाको इनार मर्मत गरेपछि अहिले पानीको राम्रो मूल भेटिएको पञ्चधुरा मन्दिरका पुजारी विनोद सिंह बताउँछन्। 

'इनारमा राम्रो मूल भेट्टाइएपछि अब पानीबाट ढुक्क हुन पाइयोजस्तो लागेको छ,' पुजारी सिंहले भने, 'इनार खानेपानीको स्रोत मात्र नभएर मन्दिरको सौन्दर्यसँग समेत गाँसिएको छ ।'

पानीको मुल फेरि फर्किएपछि माईस्थानको जनजीवन नै फेरिएको छ । ‘इनार सुक्दा स्थानीय बासिन्दा र दर्शनार्थी नुहाइधुवाइ गर्न, पानी खान र सामान्य हातगोडा धुने गर्न पनि पाएका थिएनन्, 'स्थानीयसोम कार्कीले भने, 'अहिले मर्मत गरिँदा पानीको मूल राम्रो फुटेपछि कञ्चन (सफा) पानी निस्कन थालेको छ ।' दहमा पानी भरिएपछि जंगली जीव जन्तुलाई पनि पानीखान सजिलो भएको उनले जनाए।

प्रदेश—२ भरिकै मुख्य धार्मिकस्थलमा गनिएको पञ्चधुरा माई मन्दिर परिसर धार्मिक पर्यटनको प्रशस्त सम्भावना बोकेको ठाउँ मानिन्छ । यद्यपि यस ठाउँको विकासबारे तीनै तहका सरकार उदासीन देखिएको बर्दिवास–५ माइस्थानका अर्का सामाजिक तथा राजनीतिक कार्यकर्ता भोगेन्द्रराज पौडेलको गुनासो छ ।