बर्दियामा कोरोनाका बिरामी बढे
गुलरिया : विश्वभर महामारीका रुपमा फैलिरहेको कोरोना भाइरस (कोभिड १९) संक्रमणका बिरामीको संख्या बर्दियामा ह्वात्तै बढेको छ । जिल्लामा संकलन गरिएका स्वाबका नमूना नेपालगञ्जस्थित भेरी अस्पतालमा परीक्षणका क्रममा पोजिटिभ देखिने क्रम नरोकिएपछि संक्रमितको संख्या बढेको पाइएको हो ।
बर्दियामा संक्रमितको संख्या बढेसँगै राजापुर नगरपालिका र गेरुवा गाउँपालिकाले अस्थायी कोभिड अस्पताल संचालनमा ल्याएका छन् । बर्दियामा कोरोना भाइरस संक्रमितको संख्या डरलाग्दो तरिकाले बढेको स्वास्थ्य कार्यालय बर्दियाका प्रमुख गोकर्ण गिरीले बताए ।
जिल्लामा संक्रमितको संख्या १ हजार १७६ पुगेको छ । जसमध्ये १ हजार ५७ जना निको भएका र ८३ जना सक्रिय संक्रमित छन् । उनले भने बर्दियामा हालसम्म १४ हजार २४३ जनाको पीसीआर परिक्षण भैसकेको छ । कोभिडका संक्रमणबाट ११ जनाले ज्यान गुमाएका छन् ।
बर्दियाका गुलरिया, मधुवन, राजापुर, ठाकुरबाबा, बारबर्दिया, वाँसगढी नगरपालिका तथा गेरुवा र बढैयाताल गाउँपालिकामा कोरोना भाईरस संक्रमणको जोखिम कायमै छ । जिल्लाका ८ वटा पालिकाहरु मध्ये बाँसगढी नगरपालिकामा सवैभन्दा बढी २ सय ५९ जनामा कोरोना संक्रमण पुष्टि भएको छ । जसमा २ सय ४९ जनाले कोरोना जितेको र ६ जना सक्रिय संक्रमित छन् । बाँसगढी पछि गुलरिया नगरपालिका संक्रमणको दोस्रो र मधुवन नगरपालिका तेस्रो जोखिममा छन् ।
प्रमुख गिरीका अनुसार गुलरिया नगरपालिकामा २ सय २१ जना संक्रमित, १ सय ९० जना निको र १८ जना आइसोलेसनमा उपचाररत छन् । मधुवन नगरपालिकामा पुष्टि भएका १ सय ५२ जना संक्रमितमध्ये १ सय ३५ जना निको भइसकेको र १२ जना एक्टिभ केस छन् । त्यस्तै ठाकुरबाबा १४०, बढैयाताल १२२, राजापुर ११५, बारबर्दिया १०८ तथा गेरुवा गाउँपालिकामा ५७ जनाको कोरोना पुष्टि भएको छ । पछिल्लो समय जिल्लामा कोभिडको जोखिम बढ्दो क्रममा छ ।
स्वास्थ्य प्रमुख गिरीले थपे,' कोभिडका चिन्ह, लक्षण सहितका केशहरु बढ्न थालेकाले लक्षण भएकाहरुको मात्र पीसीआर परीक्षणको लागि स्वाबको नमुना संकलन गर्न थालेका छौं । 'कोभिडका बिरामी बढ्न थालेकाले बर्दियामा कोभिड अस्पताल संचालनको तयारी अन्तिम चरणमा पुगेको छ ।
'जनशक्ति थपिएसँगै अस्पताल सुचारु गर्छौ । हामीकहाँ आइसीयू तथा भेन्टिलेटर उपलब्ध छैन । अस्पताल संचालनका लागि स्थानीय तहसँग समन्वय भइरहेको छ,' उनले भने । राजापुर नगरपालिकामा ४० शैया र गेरुवा गाउँपालिकामा १० शैयाको अस्थायी कोभिड अस्पताल संचालन गरिएको छ ।
क्रमित होम आइसोलेसनमा बस्ने क्रम बढेकाले उनीहरुको अनुगमनलाई तीव्रता दिनु आवश्यक छ । उनीहरु घरमा कस्तो अवस्थामा कसरी बसेका छन् लगायतको नियमित अनुगमन गर्नुपर्ने प्रावधान छ । स्थानीय तहमा ५ वा ३ जनाको अनुगमन समिति बनाएर घरमा बसेका संक्रमितको अनुगमन गर्न जिल्ला विपद व्यवस्थापन समिति बर्दियाले निर्णय गरेको छ ।