महोत्तरीमा लाठी चार्ज गरेर प्रहरीले राजमार्ग खुलायो : केही प्रदर्शनकारी घाइते
माघ २२, २०७७ बिहीबार १३:३६:०
बर्दिबास : प्रहरीले लाठी चार्ज गर्दै महोत्तरीको बर्दिबासमा आन्दोलनकारीले बन्द गरेको राजमार्ग खुलाएको छ । बिहानैदेखि प्रचण्ड- नेपाल पक्षका नेकपाका कार्यकर्ताले पूर्व -पश्चिम राजमार्गअन्र्तगत महोत्तरीको बर्दिबासमा राजमार्ग बन्द गराएका थिए ।
एसपी, डीएसपी नेतृत्वको टोलीले बल प्रयोग गर्दै राजमार्ग खुलाएको छ ।प्रहरीले स्कटिङ गरेर गणतव्यतर्फ सवारीसाधन पठाइरहेका छन् । बर्दिबास बन्द गराउन नपाइने भन्दै केपी ओली पक्षका कार्यकर्ता र स्थानीयले नाराबाजी गर्दै बन्द सडक खुलाउन प्रहरीलाई दबाब दिएका थिए । ५ घण्टादेखि राजमार्ग खुलाउन प्रयासरत रहेका प्रहरी टोलीले त्यसपछि लाठी चार्ज गर्दै सडक खुलाएको हो ।
संसद विघटन र संवैधानिक आयोगमा प्रधानमन्त्री केपी ओलीले गरेको असंवैधानिक कदमविरुद्ध प्रचण्ड र माधव पक्षका कार्यकर्ताले बर्दिबाससहित देशैभरी आमहड्ताल गरेको छ ।
प्रहरी र आन्दोलनकारी बीच भएको झड्पमा नेकपा प्रदेश २ का सदस्य शंकर महतो, बर्दिबास नगरपालिका वडा नम्बर १ का वडा अध्यक्ष चुडामणी पोखरेल, वडा सदस्यनिरज अधिकारी, वडा नम्बर ३ का वडा अध्यक्ष राजन ढुङ्गानालगायत घाइते भएका छन् । उनीहरुको हात, खुट्टा र टाउको चोट लागेको छ । वडा नम्बर ३ काअध्यक्ष ढुङ्गानाको टाउको फुटेको छ । बिहानैदेखि आन्दोलनकारीले बर्दिबास बजार, कलकरखाना, शैक्षिक संस्थाहरु बन्द गराएका छन् ।
प्रतिक्रिया दिनुहोस !
