वीरगन्ज : कोरोना संक्रमणको दोश्रो लहर सुरु भएयता पर्सामा शुक्रबारसम्म २ सय २६ जनाले कोरोनालाइ जितेर निको भएका छन् । दोश्रो लहर सुरु भएयता शुक्रबारसम्म पर्साको अस्पतालमा उपचार गराएका र होम आइसोलेसनमा बसेका गरी २ सय २६ जना कोरोना संक्रमण मुक्त भएका हुन् ।
वीरगन्जस्थित नारायणी अस्पतालमा भर्ना भइ उपचार गराएकामध्ये शुक्रबार सम्म ६६ जना निको भएर अस्पतालबाट डिस्चार्ज भइ घर फर्किएका छन् । नारायणी अस्पतालमा भर्ना भइ उपचार गराएका मध्ये शुक्रबारसम्म ६६ जना डिस्चार्ज भएको अस्पतालका कोभिड कोर्डिनटेर डाक्टर सरोज रोशन दासले जानकारी दिए ।
पछिल्लो २४ घण्टामा मात्र कोरोना संक्रमणबाट मुक्त भएर नारायाणी अस्पतालबाट ८ जना डिस्चार्ज भएका छन् । शुक्रबार ५ र बिहीबार ३ जना डिस्चार्ज भएका हुन् । दोश्रो लहर सुरु भएदेखि शुक्रबारसम्म नारायणी अस्पतालमा १ सय ४१ जना संक्रमित उपचारका लागि भर्ना भएको र ती मध्ये शुक्रबारसम्म निको भइ ६६ जना डिस्चार्ज भएर घर फर्किएको डाक्टर दासले जानकारी दिए ।
नारायणी अस्पतालमा शुक्रबारसम्म २४ जना संक्रमितको मृत्यु भएको छ । डाक्टर दासका अनुसार , नरायणी अस्पतालको आइसोलेसनमा अहिले ४७ जना संक्रमित उपचाररत रहेका छन् । अवस्था गम्भीर रहेकाले ती सबैलाई अक्सिजन लगाएर राखिएको डाक्टर दासले जानकारी दिए । तीमध्ये ३ जनालाई बिनाट्युबको भेन्टिलेटरमा राखेर उपचार भइरहेको उनले बताए ।
नारायणी अस्पतालले जटिल अवस्थाका कोरोना संक्रमितलाइ मात्र भर्ना लिने गरेको छ । संक्रमण पुष्टि भएका तर लक्षण सामान्य भएका संक्रमितलाई भने होम आइशोलेसनमा बस्ने गरी घर पठाइ दिने गरेको डाक्टर दासले बताए ।
होम आइशोलेसनमा बसेका १६० संक्रमण मुक्त
यस्तै पर्सा जिल्लाभरमा संक्रमण पुष्टि भएर होम आइसोलेसनमा बसेका मध्ये शुक्रबारसम्म १ सय ६० जना संक्रमण मुक्त भएका छन् ।जिल्ला प्रशासन कार्यालय पर्साका कोभिड १९ सम्पर्क व्याक्ति विनय श्रीवास्तवका अनुसार , संक्रमणको दोश्रो लहर सुरु भए यता (गत चैत देखि यता) होम आइशोलेसनमा १ हजार २ सय ६२ जना रहेकोमा शुक्रबार सम्म ती मध्ये १ सय ६० जना संक्रमण मुक्त भएका छन् । हाल पर्सामा होम आइशोलेसनमा १ हजार १ सय २ जना रहेको जानकारी पनि उनले दिए ।
उनका अनुसार , वीरगन्जका विभिन्न अस्पतालमा हाल ८१ जना संक्रमित उपचाररत छन् । नारायणी अस्पतालमा ४७ जना , नेशनल मेडिकल कलेजले बाबा होटलमा सन्चालन गरेको कोभिड अस्थायी अस्पतालमा १८ जना , बयोधा अस्पतालमा १४ जना र गण्डक हस्पिटलमा ८ जना संक्रमित उपचाररत छन् ।
प्रतिक्रिया दिनुहोस !
