राजविराजः सप्तरीमा कोरोना संक्रमणका कारण १० दिनको अवधिमा १० जनाको मृत्यु भएको छ ।
मङ्गलबार सप्तरीका १ महिला र १ पुरुषको मृत्यु भएको स्वास्थ्य कार्यालय सप्तरीले जनाएको छ । कञ्चनरुपमा कोरोना संक्रमण पुष्टि भएपछि होम आइसोलेशनमा बसेकी कञ्चनरुप नगरपालिका–८ की ६५ वर्षीया महिलाको साँझ मृत्यु भएको स्वास्थ्य शाखा कञ्चनरुपका सहसंयोजक डम्बर गुप्ताले बताए ।
ती महिलामा बैशाख २० गते कोरोना पुष्टि भएपछि होम आइसोलेशनमा बस्दै आएकी थिइन् । क्रमिक सुधार हुँदै गएकी महिलामा अचानक अक्सिजन कमी भएर अस्पताल ल्याउने क्रममा मृत्यु भएको परिवारका सदस्यले जनाएको छ ।
शवलाई नेपाली सेनाको टोलीले राति झनकट्टास्थित कोशी किनारमा व्यवस्थापन गर्ने तयारी गरिरहेको स्वास्थ्य कार्यालयका निमित्त प्रमुख दुनियालाल यादवले बताए । मृतक महिलाको परिवारका अन्य पाँच सदस्यमा पनि कोरोना संक्रमण पुष्टि भएको छ । सोही वडाका ४५ र ६० वर्षीया महिलालाई श्वासप्रश्वासमा समस्या भएपछि विराटनगर रेफर गरिएको छ ।
यसअघि बिहान १० बजे हनुमाननगर कंकालिनी नगरपालिका–१ भलुवाका ६१ वर्षीय पुरुषको बीपी कोइराला स्वास्थ्य विज्ञान प्रतिष्ठान, धरानमा मृत्यु भएको हो ।
मुटुमा समस्या भइ सोमबार स्वासप्रस्वासमा समस्या आएपछि धरानस्थित प्रतिष्ठानमा उपचाररत उनको कोरोना संक्रमण पुष्टि भए लगत्तै मङ्गलबार मृत्यु भएको मृतक परिवारका सदस्यले बताए ।
त्यसअघि आइतबार तिलाठी कोइलाडी गाउँपालिका–२ लौनियाका ८० वर्षीय पुरुष र शनिबार बोदे बर्साइन नगरपालिका–१० का ३२ वर्षीय र कञ्चनरुप नगरपालिका–१५ का ४१ वर्षीय पुरुष, बैशाख २१ गते छिन्नमस्ता गाउँपालिका–४ का ४८ वर्षीय, हनुमाननगर कंकालिनी नगरपालिका–२ का ४२ वर्षीय र सप्तकोशी नगरपालिका–१ का ५० वर्षीय पुरुष, बैशाख २० गते खडक नगरपालिका–११ की ३६ वर्षीया महिला र बैशाख १८ गते राजविराज नगरपालिका–९का ४५ वर्षीय पुरुषको मृत्यु भएको थियो ।
कोभिड–१९ को दोस्रो लहरमा सप्तरीका दुई महिलासहित १० जनाको मृत्यु भएको छ । सप्तरीमा हालसम्म कोरोनाका कारण मृत्यु हुनेको सङ्ख्या ५२ पुगेको छ ।
सप्तरीमा हाल सक्रिय संक्रमितको सङ्ख्या ५ सय १३ पुगेको स्वास्थ्य कार्यालयले जनाएको छ । हालसम्म संक्रमित भएकामध्ये १ हजार ७९८ जना निको भएका छन् । कोभिड–१९ को दोस्रो लहमा संक्तमित भएकामध्ये ३ महिला र २ पुरुष निसंक्रमित भएका छन् ।
प्रतिक्रिया दिनुहोस !
