राजविराज : कुटपिटबाट घाइते भएका सप्तरीको रुपनी गाउँपालिका–१ रायपुरका ५२ वर्षीय रामदल यादवको सोमबार मृत्यु भएको छ । कुटपिटबाट गम्भीर घाइते यादवको गोल्डेन अस्पताल विराटनगरमा उपचारका क्रममा भर्खरै मृत्यु भएको अस्पतालले जनाएको छ ।
मादक पदार्थ र नशालु पदार्थ खाएर बुधबार राति आपसमा झगडा हुँदा गाउँकै युवाहरुले धारिलो हतियारले निर्घात कुटपिट गरेको स्थानीयले बताए । सडक किनारमा टाउकोमा धारिलो हतियारले काटेर रक्ताम्मे अवस्थामा फेला परेका घाइतेलाई तत्कालै उपचारका लागि बिराटनगर पठाइएको इलाका प्रहरी कार्यालयका सइ अवधेश चौबैले बताए ।
अनुसन्धानका क्रममा प्रहरीले सोही गाउँका बिनय यादव, मुकेश यादब, मुकेश पासवान र मनोज यादब पक्राउ परेका छन् । पक्राउ परेका आरोपितहरुले कदम हटिया नजिक गाउँकै पोखरीमा माछापालन गरेर बसेका रामदलसँग बुधबार दिउँसो झगडा गरेका थिए ।
सोही झगडाको रिसमा मादक पदार्थ र नशालु पदार्थ खाएका आरोपितहरुले बुधबार राति कुटपिट गरेर घाइते अवस्थामा सडक किनारमा छाडेको मृतकका दाजु सरोबर यादवले बताए । नियन्त्रणमा लिइएका माछा, रक्सी खुवाउने भट्टीवाला सुगेन यादललाई भने अनुसन्धानपछि रिहा गरिएको छ ।
पक्राउ परेका युवाहरु यसअघि पनि कुटपिट र लागूऔषध ओसारपसारको आरोपमा पटक–पटक पक्राउ परेको स्थानीयवासीले बताए । शव बिराटनगरस्थित अस्पतालमा रहेको छ । शवको बिराटनगरस्थित कोशी अस्पतालमा पोष्टमार्टम पश्चात सप्तरी ल्याइने प्रहरीले जनाएको छ ।
प्रतिक्रिया दिनुहोस !
