दमौली : एक सय ४० मेगावाट क्षमताको जलाशययुक्त तनहुँ जलविद्युत आयोजनाको बाँधको काम एक महिनापछि सुरु हुने भएको छ। सो कामका लागि जिम्मा पाएको भियतनाम र नेपाली संयुक्त उपक्रम कालिका सोम्दा जेभीले एक महिनामा काम सुरु गर्ने आयोजनाको सञ्चालक संस्था तनहुँ जलविद्युत कम्पनीका प्रवन्ध सञ्चालक प्रदीपकुमार थिकेले जानकारी दिए ।
‘सेप्टेम्बर १ बाट काम थाल्ने प्रतिवद्धता आएको छ,’ उनले भने, ‘सम्झौताअनुसार पनि यस मितिमा काम थाल्नुपर्ने अवस्था भएकाले काम सुरु हुन्छ ।’
कोभिडका कारण जारी निषेधाज्ञाकाबीच पनि आयोजनाको विद्युतगृह र पहुँच मार्गका काम भैरहेका छन् । ठेकेदार छनौटमा ढिलाई हुँदा आयोजनाको बाँध क्षेत्रको काम सुरु हुन सकेको थिएन । बाँधमा पुग्ने पहुँचमार्गअन्र्तगत ट्रयाक खोल्ने काम भने भैसकेको छ ।
प्रवन्ध सञ्चालक थिकेले प्रशारण लाईनका लागि पनि आवश्यक तयारी पुरा भएकाले अब काम अघि बढ्ने जानकारी दिए ।
तनहुँका प्रदेश सभा सदस्यहरु डोवाटे विक, सरिता गुरुङ तथा जिल्ला समन्वय प्रमुख शान्तिरमण वाग्लेले आयोजनाबारे थिकेसँग जानकारी लिएका छन् । उनीहरुले आयोजनाको कामलाई गति दिनका लागि अनुरोध समेत गरेका छन् ।
‘आयोजनाको कामलाई गति दिनका लागि निर्देशन दिइएको छ,’ जिल्ला समन्वय समिति तनहुँका प्रवक्ता गल गुरुङले भने,‘उहाँहरुले अब गति लिन्छ भन्नुभएको छ ।’
५० करोड ५० लाख अमेरिकी डलरमा बन्न लागेको आयोजनाका लागि एडीबी, जाईका, युरोपियन इन्भेष्टमेन्ट फण्डसँगै नेपाल सरकार र प्राधिकरण समेतको लगानी छ ।
प्रतिक्रिया दिनुहोस !
