नुवाकोट : विषालु सर्पको टोकाइबाट नुवाकोटको पुर्वी भेगमा रहेको पन्चकन्याकी एक महिलाको ज्यान गएको छ । एन्टि स्नेक भेनमको समस्याका कारण महिलाको ज्यान गएको स्थानीयबासीको गुनासो छ ।
विदुरदेखि २५ किलोमिटर पुर्वमा रहेको पञ्चकन्या गाउँपालिका १ भकुण्डेकी ५६ वर्षिया दुर्गा ढकालको विषालु सर्पको टोकाइबाट ज्यान गएको जिल्ला प्रहरी कार्यालय नुवाकोटले जनाएको छ । राती घरमा सुतिरहेको बेला उनलाई विषालु सर्पले डसेको र उपचारका लागि काठमाडौं पुर्याएपछि ज्यान गएको नुवाकोट प्रहरीले जनाएको छ ।
नुवाकोटमै सर्पको डसाइमा परेकाहरुलाई एन्टि स्नेक भेनम नहुँदा उनले अकालमै ज्यान गुमाउनु परेको स्थानीयबासी तथा वडाध्यक्ष मणिनाथ लामिछानेले जानकारी दिए । लामिछानेका अनुसार सर्पले डसेका बिरामीका लागि नुवाकोटमै उपचार गर्ने सर्पदंश उपचार केन्द्र नहुँदा काठमाडौं लैजानुपर्ने बाध्यताका कारण उनको ज्यान गएको हो ।
नुवाकोट जिल्ला अस्पताल त्रिशूलीमा सर्पदंशका बिरामीका लागि आवश्यक पर्ने ‘एण्टीस्नेक भेनम’ नभएका कारण नुवाकोटमै उपचार हुन नपाउँदा बिरामीले ज्यान गुमाउनुपर्ने अवस्था आएको हो ।
सरकारले सरकारीस्तरबाट नै एन्टि स्नेक भेनमसहितको जिल्ला तहमा सर्पदंश उपचार केन्द्र सन्चालन गर्नुपर्ने सरोकारवालाहरुले माग गरेका छन्।
प्रतिक्रिया दिनुहोस !
