नुवाकोट : नुवाकोटमा दैनिक रूपमा कोरोना भाइरसका संक्रमितको संख्यामा कमी आएको छ । कोरोना संक्रमितको तुलनामा निको हुनेको संख्या बढेको छ ।
नुवाकोटमा पछिल्लो पटक ३० जना कोरानामुक्त भएसँगै जिल्लामा सक्रिय कोरोना संक्रिमतको संख्या समेत घटेको स्वास्थ्य कार्यालय नुवाकोटले जनाएको छ । कार्यालयका अनुसार नुवाकोटमा मंगलबारसम्म सात हजार ५३३ जना संक्रमित निको भइसकेका छन् ।
जिल्लामा मंगलबारसम्म १३५ महिलासहित ३०३ जना मात्र सक्रिय कोरोना संक्रमित रहेको कार्यालय प्रमुख सागरप्रसाद घिमिरेले जानकारी दिए । उनका अनुसार सक्रिय संक्रमितममध्ये २ सय ७२ जना होम आइसोलेसनमा उपचाररत छन् ।
यस्तै, १७ जना अस्पतालमा र १४ जना होम आइसोलेसनमा उपचाररत छन्। पछिल्लो २४ घण्टामा जिल्लामा ७ महिलासहित १९ जना कोरोना संक्रिमत थपिएका छन् ।
थपिएका संक्रमितमध्ये विदुर नगरपालिकाका मात्रै सात महिलासहित १६ जना रहेको कार्यालयका सूचना अधिकारी उत्तमराज खनालले जनाएका छन्। बेलकोटगढी नगरपािलकामा २ जना थपिँदा तारकेश्वर गाउँपािलकाका एक जनामा कोरोना संक्रमण पुष्टि भएको छ ।
यससँगै जिल्लामा कोरोना संक्रमितको कुल संख्या तीन हजार १४८ महिलासहित ७ हजार ८८१ जना पुगेको छ। पछिल्लो २४ घण्टामा जिल्लामा एक जना कोरोना संक्रिमतको मृत्यु भएको छ । यससँगै जिल्लामा कोरोना संक्रमणबाट मृत्यु हुनेको संख्या ४५ पुगेको छ । जसमध्ये ४४ जनाको कोरोनाको दोश्रो भेरियन्बाट ज्यान गएको हो ।
सक्रिय संक्रमितमध्ये सवैभन्दा कम एक÷एक जना पन्चकन्या र दुप्चेश्वर तथा सबैभन्दा वढि विदुर नगरपालिकामा ८८ महिलासहित एकसय ७९ जना सक्रिय संक्रमित रहेका छन् ।
नुवाकोटमा हालसम्म २६ हजार ३ सय ९९ जनाको आरटिपिसिआर परिक्षण गरिएको छ ।
प्रतिक्रिया दिनुहोस !
