बाढी पहिरोले पीडादायी घटना भयो, राज्यले सम्बोधन गर्छ : प्रधानमन्त्री देउवा
कात्तिक ४, २०७८ बिहीबार २०:५९:०
महेन्द्रनगर : प्रधानमन्त्री शेरबहादुर देउवाले सुदूरपश्चिममा बाढी र पहिरोबाट पीडादायी घटना भएको बताउँदै सरकारले त्यसको सम्बोधन गर्ने बताएका छन्। बिहीबार बाढी प्रभावित क्षेत्र निरीक्षणका क्रममा कञ्चनपुरको दोधारा चाँदनी पुगेर क्षति र पीडितलाई सम्बोधन हुने गरी गुरु योजना बनाएर अघि बढ्ने बताए।
'बाढी र पहिरोले सुदूरपश्चिममा पीडादायी घटना भएको मैले निरीक्षणका क्रममा पाए', देउवाले भने, 'भोलि नै काठमाडौं फर्किएर गुरुयोजना बनाएर सम्बोधन गरिनेछ तपाईंहरु ढुक्क हुनुहोस्।' उनले सुदूरपश्चिम बाढी र पहिरोबाट नराम्ररी प्रभावित भएको बताउँदै बाढी र पहिरोले पुर्याएको क्षति देखेर दुखित भएको बताए।
प्रधानमन्त्री देउवाको टोलीमा अर्थमन्त्री जर्नाजन शर्मा, पर्यटन मन्त्री प्रेम आले, पूर्वमन्त्री रमेश लेखक, एनपी साउँद र वीरबहादुर बलायर समेत सहभागी थिए।
कञ्चनपुरमा महाकाली नदीमा आएको बाढीले भीमदत्तनगरपालिका–९, ११, १२ र १३ नं. वडा र दोधारा चादँनीमा क्षति पुर्याएको थियो। त्यसैगरी बाढीले महाकाली नदीमा निमार्णाधीन चार लेनको पक्की पुलसँगै बनिरहेको ६ लेनको पहुँच मार्गको केही भाग कटान गरेको छ।
बाढीबाट विस्थापित अझै घर फर्किसकेका छैनन्। पीडितहरु विद्यालय, सार्वजनिक स्थान र आफन्तहरुकोमा आश्रय लिइरहेका छन्।
प्रतिक्रिया दिनुहोस !
