हङकङमा तिहारको रौनक
हङकङ : तिहारै आयो, लौ झिलिमिली
हङकङ : हङकङमा तिहारको रौनक मज्जाले लागेको छ । कोरोना कहरबाट थलिएको हङकङ र यहाँका नेपालीमाझ करिब २ वर्षपछि तिहारको रमाइलो माहोल देखिएको हो। दर्जनबढि संघसंस्थाहरुले हप्ता दिन अगाडि तिहार, देउसीभैंलो कार्यक्रमहरुको आयोजना गरिरहेका हुन् । खोटाङ् समाज हङकङले एक कार्यक्रमको आयोजना गर्दै समाजका सदस्यमाझ शुभकामना आदनप्रदान र देउसीभैंलो खेल्यो ।
समाजका अध्यक्ष निकेश गुरुङ भन्छन्,' विदेशमा हाम्रो आफ्नो भनेकै समाज त हो नि, सबैमाझ तिहार मनाउँदा, देउसी भैंलो खेल्दा नेपालकै आफ्नो गाउँघरमा भएको झल्को आयो । योसँगै भारतीय भुपु गोर्खा सैनिक संघ, नेपाली परिवार हङकङलगायत जातीय, क्षेत्रीय र सामुदायिक संघसंस्थाले तिहार देउसीभैंलोका विभिन्न कार्यक्रमहरु आयोजना गरिरहेका छन् ।
हङकङमा नेपालीहरुले व्यवसायमार्फत मनग्य जीवन निर्वाह गरिरहेका छन् । नेपालीहरुको बाक्लो बसोबास रहेको याउचिमोङ् डिष्ट्रिकमा मात्र सयौं नेपालीका पसलहरु छन्। हङकङको व्यस्त सडकका किनारामा रहेका नेपाली पसलमा देखिएका रङिचङ्गी फूल, रङ्गोली र तिहारका सामानले नेपालको झल्को दिन्छ । कतिपय किराना पसलमा नेपालमा मात्र पाइने मौलिक सामग्रीहरु समेत राखिएको छ ।
करिब ४० हजारको हारहारीमा नेपालीहरु रहेको हङकङलाई धेरैले मिनी नेपाल पनि भन्छन्। फरक फरक क्षेत्र, समुदाय र सम्प्रदायबाट आएका नेपालीहरुले आफ्नो मौलिक पर्वहरुलाई खुलेर मान्ने गर्दछन् । कोरोनाकै कारण धेरैजना आफ्नो देश फर्कन पाएनन् स्थानीय पर्वत लामा भन्छन्, 'जान सजिलो भएपनि फर्कन धेरै गाह्रो छ । २१ दिन क्वारिन्टनसँगै स्वास्थ्यका विविध मापदण्ड पालना गर्न सकस भएर पनि नेपाल जान सकिएन। आफ्नै समुदायका साथीहरुमाझ तिहार मनाउँदैछौं।
अन्य दिनको तुलनामा तिहारमा व्यापार, व्यवसाय पनि फस्टाउने स्थानीय व्यापारीहरु बताउँछन् । चाडपर्वमा खुलेर खर्च गर्ने नेपालीहरुको बानी हुन्छ, सकभर नेपालबाटै मगाइएका मौलिक सामाग्रीले खपत प्रचुर हुनाले पनि तिहारमा व्यापार बढेको उनीहरु बताउँछन्।