वीरगन्ज : मालवाहक ट्रकमा लागुऔषध ओसार्ने चारजनालाई ठूलो परिमाणमा लागुऔषधसहित प्रहरीले पक्राउ गरेको छ । वीरगन्जस्थित आइसीपी (एकीकृत भन्सार चौकी) बाट भन्सार जाँचपास भएर छुटेका दुईवटा मालवाहक ट्रकमा ठूलो परिमाणमा लागुऔषध बरामद भएपछि दुवै ट्रकका चालक र सहचालक गरि ४ जनालाई पक्राउ गरेको हो ।
पक्राउ पर्नेहरुमा बा.३ ख ८८०८ नम्बरको मिनी ट्रकका चालक मकवानपुरको मनहरी ७ का ३५ वर्षीय अनुप बर्तौला र सहचालक हेटौडा ७ का ४५ वर्षीय राजु बस्नेत तथा ना.५ ख ६८७७ नम्बरको ट्रकका चालक झापाको मेची नगरपालिका १ का ५० वर्षीय गोपाल थापा र सहचालक हेटौडा ६ का ३१ वर्षीय प्रमोद श्रेष्ठ रहेका छन् ।
आइसीपीबाट जीआइ पाइप लोड गरेर नवलपरासी जाँदै गरेका दुवै ट्रक प्रहरीले शंका लागेर वीरगन्ज २५ बहुअरीमा रोकेर चेकजाँच गरेको थियो । त्यस क्रममा बा.३ ख ८८०८ नम्बरको मिनी ट्रकमा सो परिणाममा लागुऔषध बरामद गरेको पर्साका प्रहरी नायव उपरीक्षक ओमप्रकाश खनालले जानकारी दिए ।
लागुऔषध बरामद भएपछि दुवै ट्रकसहित चालक र सहचालकलाई नियन्त्रणमा लिएर लागुऔषधसम्बन्धी कसुरमा अनुसन्धान अगाडि बढाइएको खनालले बताए।
प्रतिक्रिया दिनुहोस !
