पर्सामा कांग्रेसको पालिका र जिल्ला अधिवेशन महाधिवेशनपछि हुने

वीरगन्ज : पर्सामा नेपाली कांग्रेसको जिल्ला अधिवेशन केन्द्रीय महाधिवेशनपछि मात्रै हुने भएको छ। यस्तै १४ वटा पालिका रहेको पर्सामा पालिका अधिवेशन पनि महाधिवेशनपछि मात्रै हुने भएको छ। 

यसअघि कांग्रेसको १२ र १३ औं महाधिवेशनमा पनि पर्सा जिल्लाको जिल्ला अधिवेशन, केन्द्रीय महाधिवेशनपछि नै भएको थियो। अहिले १४ औं महाधिवेशनमा पनि पर्सामा नेताहरुको असक्षमता र गुटबाजीका कारण कांग्रेसको पालिका र जिल्ला अधिवेशन केन्द्रीय महाधिवेशन पछि हुने भएको हो। 

वडा अधिवेशन भने तोकिएकै मितिमा नगरी ढिला गरिने भएकोले अब समय अभावले पालिका र जिल्ला अधिवेशन पछि  गर्ने सहमति भएको नेपाली कांग्रेस पर्साका सचिव श्याम पटेलले बताए। उनले भने, ‘अहिले नै पालिका अधिवेशन गर्दा त्यसमा समय लाग्छ जसका कारण प्रदेशसभा निर्वाचन क्षेत्र र प्रतिनिधिसभा निर्वाचन क्षेत्र गर्न सकिंदैन। यदि प्रदेशसभा र प्रतिनिधि सभा निर्वाचन क्षेत्रको अधिवेशन भएन भने प्रदेश अधिवेशन र  महाधिवेशनमा भाग लिनबाट पर्सा जिल्ला वञ्चित हुन्छ। त्यसैले पालिका र जिल्ला अधिवेशन केन्द्रीय महाधिवेशनपछि मात्रै गर्ने सहमति जिल्लाका नेताबीच भएको छ।' 

अहिले पालिका र जिल्ला अधिवेशन नगरी प्रदेशसभा र प्रतिनिधिसभा निर्वाचन क्षेत्र अधिवेशन गर्ने तयारी भइरहेको जानकारी पनि पटेलले दिए। पटेलले भने, ‘अब प्रदेशसभा र प्रतिनिधिसभा निर्वाचन क्षेत्र अधिवेशन कहिले गर्ने भन्ने विषयमा नेताबीच छलफल चलिरहेको छ। सम्भवत मंसिर ११ वा १२ गतेको मिति तोकिने सम्भावना छ।'
 
पर्सा जिल्लामा कुल १ सय १२ वटा वडा रहेकोमा अहिलेसम्म कांग्रेसको १११ वटा वडामा अधिवेशन सम्पन्न भइसकेको छ। बाँकी रहेको छिपहरमाइ गाँउपालिका वडा नम्बर १ को वडा अधिवेशनको विषयलाई लिएर अदालतमा मुद्धा परेकाले उक्त वडाको अधिवेशन पनि तत्काल हुने सम्भावना नदेखिएको उनले बताए। 

उनले भने, ‘त्यहाँ पनि केन्द्रीय महाधिवेशनपछि नै वडा अधिवेशन हुन्छ होला।'