पृथ्वीनारायण शाहको उपदेश छिमेकी देशले समेत ग्रहण गरे : डाक्टर अहिराज

गुलरिया : राष्ट्रनिर्माता पृथ्वीनारायण शाहका दिव्योपदेश छिमेकी मुलुकहरुले आत्मसाथगर्दै ग्रहण गरेको प्रदेश २ का निवर्तमान प्रमुख डाक्टर राजेश झा अहिराजले बताएका छन्। बर्दियाको गुलरियामा निर्मित पृथ्वीनारायण शाहको पूर्णकदको शालिक उद्घाटनगर्दै प्रमुख अतिथि झाले नेपालका सरकारले शाहको नामसमेत लिन नचाहने गरेको बताए ।

शाहका दिव्योपदेशहरु पालना गरेका छिमेकी मुलुकहरुले विकासमा गति लिन सफल भएको बताउँदै नेपाली राजनितिक दलहरुले ती उपदेशहरु व्यवहारमा उतार्न नसक्दा देश यो हालतमा पुगेको जिकिर गरे । 
शाहको उपदेश आत्मनिर्भर अर्थतन्त्र, असंलग्न विदेश नीति, व्यापार, राज्य संचालन नीतिलगायतका विचारहरु दूरदृष्टियुक्त रहेकाले त्यसको महत्वलाई उपयोग गर्न अप्टेरो मान्न नहुने प्रष्ट्याए । 

बर्दिया क्षेत्र नम्वर १ का संघीय साँसद संजयकुमार गौतमको पूर्वाधार विकास कोषको १० लाख रुपैया आर्थिक सहयोगमा पृथ्वीनारायण शाहको पित्तलको पूर्णकदको शालिक निर्माण गरिएको निर्माण समितिका सचिव देवकमल पौडेलले बताए । 

गुलरियास्थित वाईपास रोडको चोकमा निर्मित शालिक स्थापनाका लागि स्वर्गिय भारतजंग शाह र उनका भाई त्रिलोक जंगशाहले जमिन सहयोग गरेका हुन् । ठाकुरबाबा नगरपालिका निवासी स्वर्गिय प्रमोदविक्रम राणाको प्रेरणाबाट शालिक निर्माणको अभियान सुरु भएको सचिव पौडेलले जानकारी दिए । पृथ्वी जयन्तीका अवसरमा आयोजित शालिक अनावरणका क्रममा नेपाली सेनाले सलामी अर्पण र झण्डोत्तोलनगर्दै गोलपार्कमा वृक्षारोपण लगायतका कार्यक्रमहरु गरिएका छन् ।