काठमाडौं : पूर्वमन्त्री एवं नेपाली कांग्रेसका नेता राजेन्द्र खरेल महेन्द्रनारायण निधि राष्ट्रिय पुरस्कारबाट सम्मानित भएका छन्। निधिको १००औं जन्मजयन्तीका अवसरमा महेन्द्रनारायण निधि स्मृति प्रतिष्ठानले खरेललाई १ लाख १ हजार रुपैयाँसहित सम्मान गरेको हो।
शुक्रबार राष्ट्रपति कार्यालय शीतल निवासमा आयोजित कार्यक्रममा राष्ट्रपति विद्यादेवी भण्डारीले खरेललाई पुरस्कार प्रदान गरिन्। राष्ट्रपति भण्डारीले खरेलसहित झापाका पुराना कांग्रेस नेता पूर्णानन्द शर्मा दाहाललाई पनि १ लाख १ हजार रुपैयाँसहित सम्मान गरेकी छन्। यसैगरी यस वर्षको प्रेमसागरी देवी निधि पुरस्कारबाट सरस्वती चौधरी र सुवर्ण ज्वारचन सम्मानित भएका छन्। उनीहरूले पनि १ लाख १ हजार रुपैयाँ प्राप्त गरे।
कार्यक्रममा बोल्दै राष्ट्रपति भण्डारीले नेपालको राजनीतिक परिवर्तनमा महेन्द्रनारायणले युवावस्थादेखि गरेको संघर्षको चर्चा गरेकी थिइन्। उनले अहिंसात्मक आन्दोलनका पक्षपाती निधिले सधैं सत्य, न्याय र समानताका पक्षमा आफूलाई उभ्याएर एकता र सामाजिक सद्भाव कायम गर्न महत्त्वपूर्ण भूमिका निर्वाह गरेको उल्लेख गरिन्।
कार्यक्रममा कांग्रेस पूर्वउपसभापति विलमेन्द्र निधिले सामाजिक र राजनीतिक रूपान्तरणमा आफ्ना पिता महेन्द्रनारायणको योगदान नेपालको राजनीतिक इतिहासमा सधैं स्मरणीय रहेको उल्लेख गरे।
प्रतिक्रिया दिनुहोस !
