वीरगन्ज : जनता समाजवादी पार्टी (जसपा) का अध्यक्ष उपेन्द्र यादवले आगामी स्थानीय तहको निर्वाचनमा सबै तहमा सत्तागठबन्धन मिलेर चुनाव लड्न सम्भव नभएको बताएका छन् । सत्तागठबन्धनमा रहेका नेकपा माओवादी र नेकपा एकीकृत समाजवादीले गठबन्धन चुनावसम्म कायम रहने बताइरहेका बेला जसपा अध्यक्ष यादवले भने सबै तहमा गठबन्धन मिलेर चुनाव लड्ने सम्भव नदेखिएको बताएका हुन् ।
सोमबार वीरगन्जमा आयोजित पार्टी प्रवेश कार्यक्रमलाई सम्बोधन गर्दै जसपा अध्यक्ष यादवले भने, 'सबै तहमा गठबन्धन सम्भव छैन , जहाँजहाँ सम्भव हुन्छ त्यहाँ गठबन्धन गरेर चुनाव लड्छौं , जहाँजहाँ सम्भव हुँदैन त्यहाँ गठबन्धनका दलहरु एक्लाएक्लै मित्रवत ढंगले चुनाव लड्छौं । '
उनले आगामी स्थानीय तहको निर्वाचनमा सबै पालिकामा जसपाले एक्लै चुनाव लड्न सक्ने तागत राखेको पनि बताए । प्रधानमन्त्री शेरबहादुर देउवाले गठबन्धन सरकारको साझा नीति तथा कार्यक्रम कार्यान्वयनका सवालमा बेइमानी गरिरहेको आरोप अध्यक्ष यादवले लगाए ।
साझा नीति तथा कार्यक्रममा उल्लेख नागरिकता ऐन सशंधोन , संविधान संशोधन , जनसंख्याको आधारमा हरेक निकायमा समानुपातिक प्रतिनिधित्वलगायतका बुँदा कार्यान्वयनमा प्रधानमन्त्री देउवाले चाँसो नै नलिएको यादवले बताए ।
उनले भने, 'कांग्रेस अचम्मको पार्टी हो , सरकारमा जानुभन्दा पहिले जेजे भन्यो त्यसमा हस्ताक्षर गरिदिन्छ, तर सत्तामा पुगेपछि सबै बिर्सिन्छ । ' अध्यक्ष यादवले अहिलेको निर्वाचन प्रणाली नै ठिक नरहेको भन्दै यसैका कारणले मुलुकको राजनीतिले स्थिरता पाउन नसकेको बताए ।
उनले भने,' निर्वाचन प्रणाली पूर्ण समानुपातिक हुनुपर्छ , यसो भयो भने चुनाव लड्न र जित्न पैसा चाहिदैन । ' मधेस जनविद्रोह र आन्दोलनले मधेसीलाई पहिचान दिएको दाबी पनि उनले गरे । अझै पनि मधेस र मधेसीले पूर्ण अधिकार पाउन नसकेको भन्दै उनले अधिकारका लागि जसपाले सडक र सदन दुवै ठाउँमा संघर्ष गरिरहेको बताए ।
नेपालका कम्युनिस्टहरु वास्तविक कम्युनिस्ट नभएको टिप्पणी गर्दै यादवले भने, 'यहाँका कम्युनिस्टहरु नाम मात्रका कम्युनिस्टहरु हुन् , उनीहरुको धन्दा भने अर्कै छ । ' एमाले अध्यक्ष केपी ओली पूर्वराजा महेन्द्र शाहको अनुयायी बनेको आरोप पनि उनले लगाए ।
जसपा पर्साका अध्यक्ष रामनरेश प्रसाद यादवको अध्यक्षतामा भएको कार्यक्रमलाई जसपाका संघीय परिषद् अध्यक्ष एवं पूर्वप्रधानमन्त्री डाक्टर बाबुराम भट्टराई , मधेस प्रदेशका मुख्यमन्त्री लालबाबु राउत , सांसद प्रदीप यादव लगायतले सम्बोधन गरे।
प्रतिक्रिया दिनुहोस !
