पर्साको छिपहरमाइको अध्यक्षमा एमाले र उपाध्यक्षमा कांग्रेस विजयी
जेठ ६, २०७९ शुक्रबार १०:४०:०
वीरगन्ज : पर्साको छिपहरमाइ गाउँपालिकाको अध्यक्षमा पुन नेकपा एमालेका मनोज गुप्ता विजयी भएका छन् । शुक्रबार बिहान सकिएको मगणनाको अन्तिम परिणाम अनुसार गाँउपालिका अध्यक्षमा एमालेका उम्मेदवार एंव निवर्तमान अध्यक्ष गुप्ता विजयी भएका हुन् ।
निकटतम प्रतिद्वन्द्वी जसपाका उम्मेदवार इन्द्रासन कलवारलाई ३२० मत अन्तरले हराउँदै एमालेका गुप्ता पुन अध्यक्षमा निर्वाचित भएका हुन् । गुप्ताले ४१८८ मत पाउँदा कलवारले भने ३८६८ मत पाएका छन् । अध्यक्षमा नेपाली कांग्रेसका उम्मेदवार नवीन सिंह भने ३५२८ मत पाएर तेश्रो स्थानमा रहे ।
यसअघि २०७४ को निर्वाचनमा भने गुप्ता नेकपा माओवादी केन्द्रको उम्मेदवार बनेर २८५१ मतका साथ गाउँपालिका अध्यक्षमा निर्वाचत भएका थिए । गुप्ता एमालेका पर्सा जिल्ला सचिव पनि हुन् । यस्तै छिपहरमाइ गाँउपालिकाको उपाध्यक्ष भने नेपाली कांग्रेसले जितेको छ । उपाध्यक्षमा कांग्रेसकी उम्मेदवार लीलावती देवी कानु निर्वाचित भएकी छन् । लीलावती देवी ३८०१ मतका साथ निर्वाचित भएकी हुन् । उनकी निकटतम प्रतिस्पर्धी एमालेकी उम्मेदवार मोदीना खातुनले भने ३५९० मत पाएकी छन् ।
प्रतिक्रिया दिनुहोस !
