काठमाडौंमा धर्ना बसेका नवलपरासीका ऋणीलाई साहुले भने : साँवा बुझाउनुहोस्, ब्याज लिंदैनौं
असार ५, २०७९ आइतबार १३:२:०
परासी : मिटरब्याजी साहुविरुद्ध भन्दै चार दिनदेखि काठमाडौंमा धर्नामा बसेका नवलपरासीका ऋणीहरुलाई सम्बन्धित साहुहरुले साँवा बुझाए ब्याज रकम मिनाहा गर्ने बताएका छन् । दृष्टिबन्धकबाट ऋण लिएका जिल्लाको प्रतापपुर र सुस्ता गाउँपालिकाबाट पुगेका ४० बढी ऋणीहरुले ऋण तिर्न नसक्दा लिलाम भएको जग्गा र चर्को रुपमा बुझाएको रकम फिर्ता हुनुपर्ने माग राखेर काठमाडौंमा दिनहुँ धर्ना दिंदै आएका छन् ।
गाउँका सुनिल बानियाँ र जगदिश बानियाँ साहुबाट मालपोत कार्यालयमा दृष्टिबन्धक गरेर ऋण लिएका ऋणीहरुले कानुनी कारबाही गरी न्याय पाउन भन्दै धर्नामा बसेका हुन् । धर्नापछि बानियाँद्वयले आइतबार परासीमा पत्रकार सम्मेलन गरेर साँवा मात्र बुझाए पनि आफूहरुले ऋण मिनाहा गर्ने बताए। आफूहरुविरुद्ध प्रशासनमा केही महिनाअघि उजुरी दिएको र प्रशासनमा छलफलमा बोलाउँदा ऋणीहरु नआएको उनीहरुको दाबी छ । ‘आरोप मात्र लगाएका छन् । प्रमाण छैन । अनि कसरी प्रशासनमा आउँछन् ? काठमाडौंमा बसेर आरोप लगाउँदैमा हुँदैन । जिल्लामा आएर छलफलमा बसौं । साँवा बुझाउन मञ्जुर हुनुहुन्छ भने ब्याज मिनाहा गरिदिन्छौं’, बाँनियाद्वयले भने।
‘मिटरब्याज र ठगीविरुद्ध संघर्ष समिति’ गठन गरेर काठमाडौंमा धर्ना दिएका ऋणीहरुले डेढ लाख ऋणको पटक पटक गरी १४ लाख बुझाउँदा पनि अझै बाँकी छ भन्दै थप कागज बनाउन दबाब दिएको आरोप लगाउँदै आएका छन् । तर बानियाँद्वयले भने केही व्यक्तिसँग लिएको ब्याजबापतको रकम भर्पाइ गरिदिएको र अधिकांशले ब्याजसमेत नबुझाएको बताएका छन् । ‘डेढ लाख ऋण बुझाउन नसक्नेले कसरी १४ लाख बुझाउँछ । कानुनभन्दा बढी रकम लिएको प्रमाण पेश गरेमा ऋणीहरुले लगाएको आरोपको रकमभन्दा दोब्बर दिन तयार छौं’, उनीहरुले भने ।
आफ्नो सामाजिक प्रतिष्ठामा आँच पुर्याउन केही व्यक्तिले उचालेर आन्दोलन गराएको पनि उनीहरुको आरोप छ । ऋण नबुझाएपछि उनीहरुले अदालतमा मुद्दा हालेर केही ऋणीहरुको जग्गा आफ्नो बनाएका छन् । दृष्टिबन्धक कागजको समय १० वर्षको हुने र त्यो अवधिसम्म पनि रकम नबुझाएपछि म्यादको ५ दिनअघि मात्र अदालतमा मुद्दा हालेको उनीहरुले बताए। ‘मुद्दा जिते पनि रकम बुझाएर जग्गा लैजानुस् भनेर पटक पटक ताकेता गरें । तर उनीहरु सम्पर्कमा आएका छैनन् । अहिले पनि जग्गा फिर्ता दिन तयार छु’, उनीहरुले भने ।
आफूसँग सम्बन्धित नरहेका व्यक्तिहरु पनि आन्दोलनमा सहभागी भएको बाँनियाद्वयको आरोप छ । सात वर्षअघि नै आफूले दृष्टिबन्धकबाट ऋण दिने कार्य बन्द गरेको उनीहरुको भनाइ छ । ‘१० वर्षअघि लिएको ऋणको अधिकांश ऋणीहरुले ब्याजसमेत बुझाएका छैनन् । तिर्न नसके मिनाहा गरिदिन्छु भनेर प्रतिनिधि सभा सदस्य माननीय हृदयेश त्रिपाठी र संविधान सभा सदस्य माननीय देवकरण कलवारको घरमै बोलाएर भनेका हौं । त्यति गर्दा पनि नमानेपछि के गर्नु ? ’, उनीहरुले भने ।
२०-५० हजार ऋण लिएका निम्न वर्गका व्यक्तिहरुको ऋण मिनाहा गरिदिनका लागि मालपोत कार्यालयमा बोलाए पनि उनीहरु नआएको उनीहरुको भनाइ छ । अहिले पनि उनीहरुको ऋण मिनाहा गर्न आफूहरु तयार रहेको बताए।
प्रतिक्रिया दिनुहोस !
