काठमाडौं : स्वास्थ्य तथा जनसंख्या राज्यमन्त्री हीराचन्द्र केसीले किर्तीपुरस्थित आर्युवेद अनुसन्धान केन्द्र र महाराजगञ्जस्थित नेसनल प्याथ ल्यावको निरीक्षण गरेका छन् ।
शुक्रबार स्वास्थ्य राज्यमन्त्री केसीले दुबै ल्याव अनुगमन गरेका हुन् ।
आर्युवेद अनुसन्धान केन्द्रको निरीक्षणका क्रममा स्वास्थ्य राज्यमन्त्री केसीले अनुसन्धान केन्द्रको बृहत् विकासका लागि आफू संवेदनशिल भएको बताए ।
उनले नेपालमा पाइने जडीबटीबारे अध्ययन, त्यसको प्रशोधन र अनुसन्धानबारे केन्द्रले काम गर्दै आएको भन्दै प्रशंसा गरे ।
मन्त्री केसीले भने, 'अनुसन्धानका लागि पर्याप्त बजेट नछुट्याएको विषयप्रति सजग छौं । धेरैजसो कर्मचारीहरु करारमा हुनुहुँदो रहेछ । यस विषयलाई मैले गम्भीर रुपमा लिएको छुँ ।’
उनले नेपालमा उत्पादन भएका करोडौं रुपैयाँका जडीबुटी विदेश निर्यात भइरहेको भन्दै उत्पादन भएका जडीबुटीको अध्ययन अनुसन्धान हुन जरुरी रहेको बताए ।
हाल केन्द्रमा एकजना ११ औं तहका कर्मचारी मात्रै स्थायी दरबन्दीमा कार्यरत छन् । अन्य सबै कर्मचारीहरु करारमा काम गर्दै आएका छन् ।
यस्तै, नेसनल प्याथ ल्यावको अनुगमनका क्रममा स्वास्थ्य राज्यमन्त्री केसीले मापदण्ड नपुगेको ल्यावले सेवा दिँदा गुणस्तरीयता र स्वास्थ्य संवेदनशिलतामा प्रश्न उठ्ने बताए । उनले भने, ‘अहिलेपनि केहि प्रयोगशालाहरु मापदण्डभित्र नरहेको पाइएको छ । मापदण्डमा रहि प्रकृयाभित्र रहेर सञ्चालनमा ल्याउन आग्रह गर्छो । नत्र भने कारबाहि गर्नुको विकल्प छैन ।’
सरकारी अस्पतालहरुले परीक्षणका नाममा निजी प्रयोगशालामा पठाउने जनगुनासो आएको भन्दै यसको नियमन आवश्यक रहेको बताए ।
स्वास्थ्य प्रयोगशाला स्थापना सञ्चालन मापदण्ड सम्बन्धी निर्देशीका २०७३ जारी भएको छ । अनुगमनमा राष्ट्रिय जनस्वास्थ्य प्रयोगशालाका निर्देशक डा.रुणा झाको पनि उपस्थित रहेको थियो ।
प्रतिक्रिया दिनुहोस !
