बढ्यो कोरोना ग्राफ : प्रत्येक घण्टा १७ नयाँ संक्रमित थपिदै, ९ परीक्षण गर्दा १ जनामा संक्रमण
साउन ९, २०७९ सोमबार १६:५६:०
काठमाडौंः कोरोना संक्रमणदर उकालो लाग्दो क्रममा रहेको छ ।
प्रत्येक घण्टा थप १७ जनामा कोरोना संक्रमण देखिने गरेको छ ।
स्वास्थ्य तथा जनसंख्या मन्त्रालयको पछिल्लो एक हप्ताको कोरोना तथ्यांक नियाल्दा प्रत्येक घण्टामा थप १७ जनामा कोरोना संक्रमण देखिएको हो।
गत मंगलबारदेखि सोमबारसम्म मात्रै थप २८ सय ८९ जनामा कोरोना देखिएको छ । यस्तै, प्रत्येक ९ जनामा कोरोना परीक्षण गर्दा एकजनामा संक्रमण देखिएको छ ।
गत मंगलबार ३३ सय ५७ जनाको कोरोना परीक्षण गर्दा ३५७ जनामा कोरोना संक्रमण पुष्टि भएको थियो ।
यस्तै, गत बुधबार ३९ सय ८१ जनामा कोरोना परीक्षण गर्दा ३९१, बिहीबार ३५ सय ६९ जनाको परीक्षण गर्दा ४३५ जनामा संक्रमण पुष्टि भएको थियो ।
स्वास्थ्य मन्त्रालयका अनुसार गत शुक्रबार ३८ सय ३८ जनाको कोरोना परीक्षण गर्दा ४५६, शनिबार २९ सय ९६ जनाको परीक्षण गर्दा ३३५ जनामा संक्रमण देखिएको थियो ।
यस्तै, आइतबार ३८ सय ८८ जनाको कोरोना परीक्षणका क्रममा ३४७ जना संक्रमित थपिएका थिए ।
आज ४८ सय जनाको कोरोना परीक्षण गर्दा ५६८ जनामा संक्रमण पुष्टि भएको छ ।
केहि दिनयता सक्रिय संक्रमितको संख्या पनि बढ्दो क्रममा रहेको छ । गत मंगलबार १९८२ सक्रिय संक्रमित रहेकोमा आजसम्म ३५ सय ३४ जना सक्रिय संक्रमित रहेका छन् । स्वास्थ्य मन्त्रालयले संक्रमणदर बढ्दै गएको भन्दै मास्कको समूचित प्रयोग, भौतिक दुरी कायम र व्यक्तिगत सरसफाईमा विशेष ध्यान दिन अपिल गरेको छ ।
प्रतिक्रिया दिनुहोस !
