नुवाकोट : नुवाकोटको बेलकोटगढी नगरपालिका-९ स्थित सडकखण्डमा गस्तीमा रहेका प्रहरीमाथि स्थानीय युवाहरूले आक्रमण गरेका छन्।
प्रहरीमाथि हातपात गरेको आरोपमा २१ वर्षीय रामबहादुर तामाङ, सोही स्थानका २१ वर्षीय मानबहादुर तामाङ र २० वर्षीय सुबास तामाङ पक्राउ परेका हुन्।
प्रहरी सहायक निरीक्षक र प्रहरी जवानमाथि सार्वजनिकस्थलमा मादक पदार्थ सेवन गरी हातपात गर्नेलाई पक्राउ गरी विदुरस्थित प्रहरीको हिरासतमा राखिएको प्रहरी नायव उपरीक्षक रूपक खड्काले जानकारी दिए।
उनका अनुसार मादक पदार्थ सेवन गरी हो-हल्ला गरेको जानकारीसँगै प्रहरी टोली खटेर सो स्थानमा गई युवकहरूलाई सम्झाईबुझाई गर्दा उल्टै प्रहरीहरूलाई विभिन्न अपशब्द प्रयोग गरी गालीगलौज र हातपात समेत गरेकाले पक्राउ गरिएको हो। उनीहरूलाई अभद्र व्यवहार मुद्दामा जिल्ला प्रशासन कार्यालय नुवाकोटबाट म्याद लिई थप अनुसन्धान भइरहेको उनले बताए।
प्रतिक्रिया दिनुहोस !
