राजविराज : नेपाली कांग्रेसका महामन्त्री गगनकुमार थापा सप्तरी-१ बाट उम्मेदवारका लागि सिफारिस भएका छन्।
आगामी मंसिर ४ गते हुने निर्वाचनमा प्रतिनिधिसभा सदस्यको उमेदवारका लागि क्षेत्रीय समितिको बैठकले थापाको नाम सर्वसम्मत सिफारिस गरेको क्षेत्रीय सचिव दुर्गा भट्टराईले जानकारी दिए।
थापाको नाम कास्की-१ बाट पनि सिफारिस भएको थियो। तर, थापाले आफू काठमाडौं-४ बाटै चुनाव लड्ने स्पष्ट पारिसकेका छन्।
गत शनिबार मात्र क्षेत्रीय समिति काठमाडौं-४ को बैठकले थापालाई काठमाडौं-४ बाट प्रतिनिधिसभा सदस्यको उम्मेदवारका लागि सिफारिस गरेको थियो।
महामन्त्री थापा पछि दोस्रोमा सप्तरी जिल्ला सभापति रामदेब साह र र तेस्रोमा जिल्ला सभापतिमा समेत साहका प्रत्यासी रहेका शत्रुघ्न प्रसाद यादबको नाम सिफारिस गरिएको छ।
कांग्रेसले प्रदेश सभा सदस्यका लागि सप्तरी-१ 'ख' बाट बद्रीनारायण महात्मानको एकल नाम सिफारिस गरेको छ।
सप्तरी-१ 'क' बाट पूर्व मन्त्री हेमराज तातेड, मधेस प्रदेश कार्यसमितिका सह-महामन्त्री पर्शुराम चौधरी, महासमिति सदस्य हेमनारायण चौधरीसहित आठ जनाको नाम सिफरिश गरेको छ।
प्रदेश १ 'क' बाट महाधिवेशन प्रतिनिधि उमेश बस्नेत, क्षेत्रीय सचिव भट्टराई, दिपक कुमार गुप्ता, अशोक कुमार चौधरी र रमेश खतिवडाको नामसमेत सिफारिस गरेर पठाइएको छ।
प्रतिनिधि सभा तथा प्रदेश सभा सदस्य २०७४ को निर्वाचनमा जसपाका डा. सूर्यनारायण यादव निर्वाचित भएका थिए। प्रदेश १ 'क' मा नेकपा (एमाले)का सत्यनारायण मण्डल र प्रदेश २ 'ख' मा राजपाका नवलकिशोर साह निर्वाचित भएका थिए।
डा. यादव र साह हाल जसपामा आबद्ध छन्। साह मधेस प्रदेशका समाजिक विकास मन्त्री हुन्। मण्डल एमाले मधेस प्रदेश सभाको संसदीय दलका नेता हुन्।
प्रतिक्रिया दिनुहोस !
