'हामीप्रति जनताको भरोसा छ’

प्रहरी सेवाबाट अवकाश पछि एमाले प्रवेश गरेका पूर्वडीआईजी नवराज सिलवाल ललितपुर क्षेत्र नं १ बाट प्रतिनिधिसभा सदस्यका उम्मेदवार हुन् । २०७४ सालको निर्वाचनमा उनी सोही क्षेत्रबाट विजयी भएका थिए । यसपटक गठबन्धनका उम्मेदवार उदय शमशेर राणासँगै चुनावी प्रतिस्पर्धामा उत्रिएका नेता सिलवालसँग अन्नपूर्णकर्मी रामकला खड्काले गरेको कुराकानी ।

निकै उत्साहपूर्ण ढंगमा टोलटोलबाट निस्किएर उहाँहरूले हामीलाई सहयोग गरिरहनुभएको छ । पाँच वर्ष मैले जुन काम गरें, विकास र सम्वृद्धिको जुन आधार निर्माण गरें, त्यसप्रति उहाँहरूको भरोसा र विश्वास छ । फेरि त्यही जगमाथि हामीले थप निर्माण गर्नुपर्नेछ । युवा र महिलालाई रोजगारीसँग जोड्नुपर्नेछ ।

प्रहरी सेवामा रहेर काम गरेपछि राजनीतिमा प्रवेश गर्नुभयो । यी दुई क्षेत्रमा काम गर्दाको अनुभव कस्तो पाउनुभयो ?

हिजो पनि मैले जनतालाई सामाजिक न्याय दिने हिसाबमै काम गरेको हुँ । आज पनि कानुन बनाउने र त्यसको कार्यान्वयन गरी मुलकको समग्र विकास र सम्वृद्धिमा काम गरें । हिजोभन्दा आजको क्षेत्र अलि विशाल छ । तर म एउटै हिसाबले जनता र समाजकै सेवामा समर्पित छु । मैले राष्ट्रिय र अन्तर्राष्ट्रिय रुपमा जनताको भरोसा र विश्वास पाएको छु । मैले गरेका कामका मुल्यांकन भएका छन् । हिजो र आजको अनुभव मिलाएर भन्नुपर्दा म एकदमै खुसी छु । 

यसपटक तपाईंका चुनावी एजेन्डाहरू के के छन् ?

यसपटक हामीले दुई चारवटा ल्याण्डमार्क योजनाहरू अघि सारेका छौं । भट्टेडाँडामा आन्तरिक विमानस्थल बनाउनुपर्ने माग राखेका छौं ।  ललितपुरको चापागाउँ क्षेत्र लिच्छविकालिन सहर हो । लिच्छविकालिन संस्कृति, सभ्यता, जात्रा, पर्व, फाल्चा, पोखरी, मन्दिर सबैलाई संरक्षण गरेर यसलाई ऐतिहासिक सहरको रूपमा स्थापना गर्ने योजना छ । बज्रबाराही मन्दिर वरपर रहेका बनलाई बगैचा बनाउने र चापागाउँ, लेले, गोदावरी, फुलचोकी क्षेत्रलाई पर्यटकीय स्थलको रुपमा विकास गर्न डीपीआर तयार गरिसकिएको छ । लेले चन्दनपुर सडकलाई लेले चन्दनपुर, ठूला दुरलुङ, फापरबारी हुँदै धरान चतारासम्म जोड्ने एउटा राजमार्गका रूपमा विकास गर्ने छौं । गोदावरीबाट काभ्रेको माने भन्ज्याङसम्म जोड्ने एउटा सुरुङ निर्माण गर्ने अभियानको पनि डीपीआर पुरा भइसकेको छ । दलचोकी, माझखण्ड, कालेश्वर र बैतरणी धाम लगायतका ठाउँलाई पर्यटकिय गन्तब्यको रुपमा विकास गर्ने योजना छ । तत्कालिन रुपमा आर्थिक सामाजिक रुपमान्तरणका लागि युवा र महिलालाई रोजगारीसँग जोड्ने सोच छ । घरघरमा रोजगारी सिर्जना गरी उद्यमशीलता विकास गर्ने अभियान अगाडि बढाएका छौं । हरेक गाउँपालिकामा एउटा उद्योगग्राम बनाउने हाम्रै सरकारको पालामा गरेको निर्णय कार्यान्वयन गराउन काम गर्छौं । कृषि, सेवा क्षेत्र, पर्यटन र उद्योगमा व्यापक रूपमा रोजगारी सिर्जना गरेर हामी ललितपुर क्षेत्र नम्बर १ लाई आर्थिक रूपमा सवल बनाउनेछौं । 

राजनीतिमा प्रवेश गर्दा किन एमाले नै रोज्नुभयो ? 

एमाले जनताको पार्टी हो । यसले सामाजिक न्यायसहितको सम्वृद्धिको कुरा गरेको छ । असल लोकतन्त्रको कुरा गरेको छ । सामाजिक न्यायसहितको सम्वृद्धि हासिल गरी कसरी समाजवादसम्म जाने भन्ने बहुदलिय जनवादको लोकप्रिय नारा र विचार लिएको छ । त्यो विचारले मजदुर, किसान, उत्पीडित र पछाडि परेका वर्गहरूलाई समेटेर अगाडि बढ्न प्रेरित गर्छ । एमाले नै एउटा यस्तो पार्टी हो जसले मुलुकको रुपान्तरणमा सहयोग पुर्‍याउँछ । त्यसैले एमाले नै रोजेको हुँ । 

अघिल्लो कार्यकालमा तपाईं गृहमन्त्री हुने हल्ला चलेको थियो । चुनाव पछि एमाले नेतृत्वको सरकार बने, मन्त्री हुने रहर छ कि ? 
पार्टी र जनताले चाहेको अवस्थामा आवश्यकता अनुसार म जुनसुकै जिम्मेवारी लिन तयार छु । गृह मन्त्रालयलगायत महत्वपूर्ण जिम्मेवारी निर्वाह गर्न सक्ने अनुभव र क्षमता राख्छु । र म त्यो जिम्मेवारी लिन उत्सुक छु । लिएपछि उत्कृष्ट ढंगले काम गर्न सक्ने व्यक्ति पनि हुँ । 

निर्वाचनमा नयाँ पुस्ता र स्वतन्त्रको बढ्दो लहरलाई कसरी हेर्नुहुन्छ ?

अहिलेको नयाँ पुस्ता भनेकै हामी हौं । युवा भनेको हामी नै हौं । म राजनीतिमा आएको पनि यसलाई सुधार्न हो । राजनीतिमा रहेका विकृतिलाई अन्त्य गरेर अगाडि बढ्नु पर्छ भनेर हो । नयाँ पुस्ताको जिम्मेवारी पनि हामी नै लिन्छौं । जनताका मुर्जाएका सपनालाई ब्युझाउने काम हामीले गरिरहेका छौं । ती सपनालाई साकार बनाउने अभियानमा हामी लाग्नेछौं । 

प्रहरी सेवामा रहँदा अन्त्यतिर तपाईंको पदमाथि नै राजनीतिकरण भयो । राजनीतिमा लाग्दा यस भित्रका गलत प्रवृति हटाउन सकिन्छ भनेर पो रोज्नुभएको हो कि ?

यसलाई सम्पूर्ण रूपमा परिवर्तन गर्नुपर्छ । किनभने न्यायमुलक ढंगले सबैभन्दा सिनियर र उत्कृष्ट मान्छेलाई नबनाएर शेरबहादुर देउवाहरूले ममाथि राजनीति गर्नुभयो । त्यसलाई चिर्नुपर्छ । तपाईंहरू सर्वेसर्वा होइन, मनपरी गर्न पाउनुहुन्न भन्ने आवाज पनि हो मेरो । संस्थाहरूलाई राजनीतिकरण गर्ने पुरानो शासन शैलीलाई चिर्ने र कानुन बमोजिम स्वतन्त्र ढंगले चल्ने प्रणालीको विकास गरेर जाँदा जनतामा सेवा प्रवाह पनि हुन्छ । यसले भ्रष्टाचारी, घुसखोरी, काममा ढिलासुस्ती जस्ता समस्यालाई हटाउन सकिन्छ । देउवाको कुरा गर्नुहुन्छ भने त्यतिखेर मलाई नदिने मात्र होइन, थुन्ने र रेड कर्नर नोटिस जारी गर्ने गरे । जिन्दगीभर जेलमा सडाउन यी तमाम नक्कली मुद्धा खडा गर्न लागी परेकै हुन् । अब उनको समय सकिएको छ । उनीजस्ता व्यक्तिलाई विदा गरेर नयाँ सोच, दृष्टिकोण र युवा पुस्ताले सोचेअनुरुप राजनीतिमा निर्मलीकरण गरेर जानुपर्नेछ । त्यसमा मेरो पनि योगदान हुनेछ । 

जितको सम्भावना कत्तिको देख्नुभएको छ ?

हामी सतप्रतिशत जित्छौं । जनताको भरोसा छ हामीसँग ।  नेकपा एमाले र नवराज सिलवालको पक्षमा जनता घरघर, टोलटोल ,गाउँगाउँ र बस्तीबस्तीबाट उठेका छन् । । मैले पाँच वर्ष निस्वार्थ ढंगमा विकास निर्माणका जुन काम गरें,  मेरो जनप्रतिनिधि भनेर जनताले गौरव गर्ने हिसावले गरें । यो सामान्य चुनाव होइन । यो राष्ट्रियता जोगाउने चुनाव हो । अत्याचार र निष्ठाबीचको, भ्रष्टाचार र सुशानबीचको चुनाव हो । हामी न्याय, सुशासन र सम्वृद्धिको पक्षमा छौं । जनताको पक्षमा छौं । त्यसैले जनताको साथले गठबन्धनका उमेदवारप्रति विजय प्राप्त गर्ने मैले विश्वास गरेको छु ।