नुवाकोट : अस्थायी मतदान केन्द्र रहेको नुवाकोट जिल्ला कारागारमा शतप्रतिशत मत खसेको छ । विदुर नगरपालिका -१ ढुंगेमा रहेको नुवाकोट जिल्ला कारगारमा कायम गरिएको अस्थायी मतदान केन्द्रमा २४ जना कैदीबन्दीले मतदान गरेका छन् ।
कारागारमा रहेका कैदीबन्दीहरुका लागि कारागारमै अस्थायी मतदान केन्द्र कायम गरिएको थियो । एक घण्टामै शतप्रतिशत मत खसेको कारागारका प्रमुख तथा निर्वाचन अधिकारी गंगालाल योगीले जानकारी दिए । उनका अनुसार मतदान शतप्रतिशत भएपछि निर्वाचन आयोगको निर्देशन अनुसार कार्य सम्पादन गरिएको छ ।
नुवाकोट कारागारमा २४ कैदीबन्दी र दुईजना अस्थायी मतदाता नामावलीमा नाम समावेश रहेको समेत गरी २६ मत खसेको छ । नुवाकोट जिल्ला कारागारमा हाल १६ महिलासहित एकसय ६६ जना कैदीबन्दी रहेका छन् । अन्य कैदीबन्दीको मतदाता नामावलीमा नाम नभएपछि मतदान गर्न पाएनन्।
रसुवाको धुन्चेस्थित जिल्ला कारागारमासमेत शतप्रतिशत मत खसेको छ । यहाँ पनि एक घण्टामै शतप्रतिशत मत खसेको हो । सो कारागारमा १३ जना कैदीबन्दी र अन्य चारजना अस्थायी मतदाता नामावलीमा नाम समावेश रहेका कर्मचारीसमेत गरी १७ जनाले मतदान गरेको रसुवा कारागारका जेलर तथा सहायक मतदान अधिकृत हरिराम न्यौपानेले जानकारी दिए ।
उनका अनुसार मतपेटिका भने बेलुकी ५ बजेसम्म नै मतदान केन्द्रमा राखिनेछ । धुन्चेमा रहेको रसुवा कारागारमा हाल विभिन्न मुद्दामा आठ महिलासहित ८१ जना कैदीबन्दी रहेका छन् । कारागारमा दलका प्रतिनिधिहरुको रोहवरमा मतदान कार्य सम्पन्न गरिएको हो ।
प्रतिक्रिया दिनुहोस !
