बाजुरा : बुढिगंगा नगरपालिका १ अम्कोटमा बालबालिकामा दादुराको लक्षण देखिएको छ। बुधबार धुरालसैन आधारभूत स्वास्थ्य केन्द्रमा उपचारमा लागि आएका ७ जना बालबालिकामा दादुरको लक्षणहरू देखिएको स्वास्थ्य केन्द्रमा कार्यरत अनमि बिन्दु बिष्टले बताइन्।
उपचारमा आएका ७ जना बालबालिका अम्कोट गाउँमा रहेको र उनीहरू एउटै टोलका रहेको अनमी बष्टिले बताइन् । स्वास्थ्य केन्द्रमा चेकजाँच गर्दा सबैमा एकैखाले लक्षण रहेको स्वास्थ्यकर्मीले बताएका छन् ।
बालबालिकामा १०२ देखि १०३ डिग्रीसम्म ज्वरो आएको, शरीरभरि बिमिरा रहेको,खोकी लाग्ने, सिगान बग्ने जस्ता लक्षण देखा परेको स्वास्थ्य केन्द्रले बताएको छ । गाउँमा अन्य बालबालिकामा समेत यस्तो रोग देखा परेको स्थानीयले बताए । एक हप्तादेखि यो रोग देखा परेको स्थानीयले बताएका छन्।
एउटै टोलका ७ बालबालिकामा दादुरा रोगको जस्तो लक्षण देखा परेकाले नगरपालिकालाई यसबारे जानकारी गराइसकेको स्वास्थ्य केन्द्रले बताएको छ।
बुढिगंगा नगरपालिका स्वास्थ्य संयोजक दिपक शाहका अनुसार दादुराजस्तो रोग देखिएको जानकारी आएको बताए । बिहीबार नगरपालिकाबाट स्वास्थ्यकर्मीको टोली पठाएर चेकजाँचका लागि धनगढी प्रयोगशालामा पठाउने शाहले बताए।
रोग अन्य व्यक्तिमा सर्न नदिन समुदायस्तरमा जनचेतना फैलाउने काम भएको संयोजक शाहले बताएका छन् ।
प्रतिक्रिया दिनुहोस !
