गण्डकीका मुख्यमन्त्रीको वार्षिक कृषि आम्दानी ६ लाख, ऋण काढेर काठमाडौंमा घडेरी

पोखरा  : अक्सर धेरैको मुखबाट सुनिन्छ–कृषिबाट कमाइ नै हुँदैन । खेतीपाति निर्वाहमुखी मात्रै भयो । व्यवसायिक किसानका पनि गुनासा त्यस्तै हुन्छन् ।  गण्डकी प्रदेशका मुख्यमन्त्री खगराज अधिकारीको सम्पति विवरण हेर्दा भने उनको आम्दानीको गतिलो स्रोत कृषि नै देखिन्छ । अधिकारीले शुक्रबार सार्वजनिक गरेको सम्पत्ति विवरणमा उनले खेतबारीबाट कृषि फसलमार्फत् वार्षिकरुपमा गरेको आम्दानी ६ लाख रुपैयाँ उल्लेख छ । 

पुस २५ गते मुख्यमन्त्री नियुक्त अधिकारीले बैशाख ८ गते शुक्रबार सम्पत्ति विवरण सार्वजनिक गरेका हुन् । मुख्यमन्त्री अधिकारीले श्रीमती रमा पाण्डेको नाममा अग्रगामी कृषि फार्ममा साढे १६ लाख रुपैयाँ लगानी गरेको सम्पत्ति विवरणमा उल्लेख छ । 

विवरणमा उनले ८० लाख रुपैयाँमा काठमाडौं चन्द्रगिरीमा घडेरी किनेको,त्यसका लागि प्रभु बैंकबाट ऋण लिएको उल्लेख गरेका छन् । गण्डकी विकास बैंक (हाल इन्भेस्टेमेन्ट मेगा बैंक) मा मुख्यमन्त्री अधिकारीको २४ सय ९७ कित्ता सेयर छ । 

मुख्यमन्त्री अधिकारीले आइट्वान्टी कार बिक्री गरी आएको रकममा थपेर स्कोरपियो खरिद गरेको सम्पत्ति विवरणमा उल्लेख छ ।  सहकारीमा नगद बचत १५ लाख रुपैयाँ मौज्दात रहेको उल्लेख गरेका मुख्यमन्त्रीको सम्पत्ति विवरणमा ३५ लाख रुपैयाँ व्यक्तिगत रुपमा ३ जनासँग ऋण लिएको र १० लाख तिरेको पनि लेखिएको छ ।

अधिकारीसँग ३ तोला सुन छ । मुख्यमन्त्री अधिकारीले पुर्ख्याौली सम्पत्ति बेचबिखनबाट पोखरा १२ मा घर बनाएको र पुर्ख्याौली ठाउँ पोखरा ३१ मा जग्गा जमिन रहेको जनाएका छन् ।