रामेछापका स्थानीय तहको बेरुजु बढ्दो क्रममा
रामेछाप : रामेछापका स्थानीय तहमा बेरुजु बढ्दै गएको छ। जिल्लामा रहेका आठवटा स्थानीय तहमा आर्थिक वर्ष २०७८/७९ मा ३७ करोड ७९ लाख रुपैयाँ रकम बेरुजु देखिएको छ।
महालेखा परीक्षकको ६० औँ प्रतिवेदन अनुसार जिल्लाको खाँडादेवी गाउँपालिकाको बेरुजु सबैभन्दा बढी देखिएको छ। आर्थिक वर्ष २०७८/०७९ मा खाँडादेवी गाउँपालिका बेरुजु ९ करोड २९ लाख १३ हजार रहेको प्रतिवेदनमा उल्लेख छ।
आर्थिक वर्ष २०७७/०७८ मा ५ करोड ६७ लाख ४ हजार रुपैयाँ बेरुजु आएको खाँडादेवीमा यस वर्ष बेरुजु बढेर ९ करोड २९ लाख नाघेको हो।
आर्थिक वर्ष २०७७/०७८ मा ४ करोड ५६ लाख रुपैयाँ बेरुजु रहेको गोकुलगंगा गाउँपालिकाको बेरुजु रकम आर्थिक वर्ष २०७८/०७९ मा ५ करोड ६९ लाख ३१ हजार रुपैयाँ पुगेको छ।
आर्थिक वर्ष २०७७/०७८ मा ४ करोड १७ लाख ४० हजार रुपैयाँ बेरुजु रहेको लिखु तामाकोशी गाउँपालिकाको बेरुजु आर्थिक वर्ष २०७८/०७९ मा ४ करोड ९३ लाख ८ हजार देखिएको छ।
सुनापति गाउँपालिकाको बेरुजु ४ करोड ७९ लाख ४५ हजार रुपैयाँ देखिएको छ। अघिल्लो आर्थिक वर्षमा सुनापतिको बेरुजु रकम ६७ लाख ८५ हजार थियो।
दोरम्बा शैलुङ गाउँपालिकाको बेरुजु ४ करोड ६६ लाख ७८ हजार रुपैयाँ छ। आर्थिक वर्ष २०७७/०७८ मा यो पालिकाको बेरुजु रकम १ करोड ७४ लाख ३२ हजार थियो।
आर्थिक वर्ष २०७७/०७८ मा ३ करोड ४३ लाख ६० हजार रुपैयाँ बेरुजु रहेको मन्थली नगरपालिकाको पनि यस वर्ष बेरुजु बढेर ५ करोड २० लाख ५८ हजार रुपैयाँ पुगेको छ। आर्थिक वर्ष २०७८/०७९ मा उमाकुण्ड गाउँपालिकाको बेरुजु रकम २ करोड ४७ लाख ९१ हजार रुपैयाँ छ।
आर्थिक वर्ष २०७८/०७९ मा रामेछाप नगरपालिकाको ७२ लाख ८३ हजार रुपैयाँ बेरुजु देखिएको छ। अघिल्लो आर्थिक वर्षमा रामेछाप नगरपालिकाको बेरुजु रकम १ करोड ५१ लाख ६० हजार रुपैयाँ थियो।