सिरहा : सिरहाको लहान नगरपालिका–१८ विसनपुरमा दुग्ध किसानहरुले उत्पादन गरेको दूध संकलनका लागि केन्द्र सञ्चालनमा आएको छ । ५ सय लिटर क्षमताको दूध चिलिङ्ग भ्याट मेशिन पनि जडान गरिएको छ ।
नगरपालिकाले संरक्षण परियोजना अन्तर्गत ८०-२० प्रतिशत अमृतपान कृषि सहकारीसँगको सहकार्यमा उक्त दूध संकलन केन्द्र सञ्चालन गरेका हुन् । केन्द्रमा आवश्यक पर्नेमा अटोमेटिक दूध एनलाइजर मेशिन, जेनेरेटर, स्टेवलाईजर, दूध परीक्षण किट, किसानहरुलाई दूध संकलन गरेर ल्याउने भाडो र पशुका लागि चाहिने क्यालसियम लगायतका सामग्री सहयोग गरिएको छ ।
१२ लाख ५० हजार लागतमा २० प्रतिशत रकम सहकारीले साझेदारी गरेका छन् । मेयर महेश चौधरीका अनुसार नगरपालिकाले सहकारीलाई थप ५ लाख रुपैयाँ सामुदायिक वीउ बैंक स्थापना गर्न अनुदान दिएको छ । ‘यस कार्यले ग्रामीण अर्थतन्त्र, ग्रामीण स्वरोजगार बढाउनेछ,’ उनले भने, ‘यस भेगका ५ सय भन्दा बढी किसान लाभान्वित हुने आकलन गरेका छौँ ।’
यसै परियोजनाबाट ४०० किसानलाई ३५ हजारको दरले किसान कार्डमार्फत अनुदान पनि वितरण भएको छ । जसमध्ये १५० जना किसान दूध उत्पादन कार्य गरिरहेको छ । अब उनीहरुले उत्पादन गरेको दूध यही संकलन गरेर बिक्री वितरण हुने जनाएको छ ।
यहाँ वडा नं. १५ र १८ हुँदै मुतनी खोला बग्छ । त्यही वरिपरिका कृषकहरुलाई आर्यआर्जनमा जोड्न संरक्षण परियोजना सञ्चालन छ । १५ वटा कृषक समूह र ९ वटा सामुदायिक वनसँग मिलेर कृषि, सामुदायिक वन, पशुपालन लगायतमा क्षेत्रमा काम भइरहेको छ । परियोजनामा नगरपालिकासँगै राष्ट्रिय कृषक समूह महासंघ नेपाल, सामुदायिक वन उपभोक्ता महासंघ नेपाल, केयर नेपाल र जर्सी ओभरसिजले सहयोग गरिरहेको छ ।
प्रतिक्रिया दिनुहोस !
