ठूलो संकटमा थलपति विजय, सरकार बनेको दुई महिनामै किन परे विवादमा ?
असार ३२, २०८३ बिहीबार १६:४४:१
भारत : भारत तमिलनाडुमा गत मे महिनामा भएको चुनाव जितेर थलपति विजयले राजनीतिमा दमदार प्रवेश गरेका थिए । तर सरकार गठन भएको दुई महिनामै उनको नेतृत्वको टीभीके सरकार गम्भीर विवादमा परेको छ । यसको कारण हालै राज्यमा भएको एउटा सनसनीपूर्ण घटना हो । तमिलनाडुको नागरकोइलस्थित एक जेलमा एक अपाङ्ग कैदीको न्यायिक हिरासतमा मृत्यु भएपछि राज्यभर राजनीतिक हलचल मच्चिएको छ । विपक्षी दलहरूले यस घटनालाई लिएर विजय सरकारमाथि कडा आलोचना गरेका छन् ।
नागरकोइलको एथनकाडु निवासी ३५ वर्षीय अपाङ्ग एस. सबरी वर्मनलाई जुलाई ९ मा थेंथमराईकुलम प्रहरीले प्रतिबन्धित गुट्खा बिक्री गरेको आरोपमा पक्राउ गरेको थियो । प्रहरीका अनुसार उनको पसलबाट करिब २०० ग्राम प्रतिबन्धित सुर्तीजन्य पदार्थ बरामद गरिएको थियो । सुरुमा उनको मृत्युलाई सामान्य रूपमा देखाउने प्रयास गरिएको बताइए पनि पोस्टमार्टम रिपोर्ट सार्वजनिक भएपछि घटना नयाँ मोडमा पुगेको छ । रिपोर्टमा मृतकको शरीरमा कुहिनो, घुँडा, हात र खुट्टासहित १९ वटा स्थानमा चोटपटकका निशान भेटिएका छन् ।
जानकारीअनुसार जुलाई १३ को मध्यरातमा सबरी वर्मन र सोही ब्यारेकका अन्य कैदीबीच झगडा भएको थियो । त्यसपछि झगडा छुट्याउन पुगेका जेल कर्मचारीहरूले समेत उनलाई निर्घात कुटपिट गरेको आरोप लागेको छ, जसका कारण उनको मृत्यु भएको बताइएको छ । विवाद बढेपछि प्रहरीले सीसीटीभी फुटेज र प्रत्यक्षदर्शीको बयानका आधारमा एक जना मुख्य वार्डनसहित तीन जेल कर्मचारीलाई निलम्बन गरी पक्राउ गरेको छ । साथै, घटनामा संलग्न रहेको आरोपमा आठ जना कैदीविरुद्ध पनि मुद्दा दर्ता गरिएको छ ।
‘सरकार तमाशा मात्र हेरिरहेको छ’
यस घटनापछि तमिलनाडुमा राजनीतिक आक्रोश बढेको छ । डीएमके सांसद कनिमोझीले पीडित परिवारसँग भेट गरी समवेदना व्यक्त गर्दै प्रहरी र प्रशासनको भूमिकामाथि प्रश्न उठाएकी छन् ।
उनले सामाजिक सञ्जाल एक्समा लेखेकी छन्, ‘हिरासतमा भएको यस मृत्युको तीन दिन बितिसक्दा पनि मुख्यमन्त्री सी. जोसेफ विजयले कुनै स्पष्टीकरण वा प्रतिक्रिया दिएका छैनन् । सरकारका कुनै मन्त्री पीडित परिवारलाई भेट्न पुगेका छैनन् । पीडित परिवारलाई राहत दिने कुनै पहल समेत गरिएको छैन । सधैंझैँ टीभीके सरकार जिम्मेवारी लिनुको सट्टा तमाशा मात्र हेरिरहेको छ ।’
सीबीआई अनुसन्धानको माग
यता, भाजपा तमिलनाडुका प्रदेश अध्यक्ष नैनार नागेन्द्रनले यस घटनालाई अत्यन्तै भयावह भन्दै राज्यको कानून–व्यवस्था कमजोर भएको आरोप लगाए । उनले मुख्यमन्त्रीसँग तत्काल प्रभावकारी कदम चाल्न माग गरेका छन् । त्यस्तै, पीएमके नेता डा. अन्बुमणि रामदासले घटनाको निष्पक्ष छानबिनका लागि सीबीआईबाट अनुसन्धान गरिनुपर्ने माग गरेका छन् ।
प्रतिक्रिया दिनुहोस !
