इरानका सैन्य ठेगानाहरूमाथि अमेरिकाको आक्रमण, राम्रो व्यवहार गर्न ट्रम्पको चेतावनी
असार ३२, २०८३ बिहीबार ९:३२:२७
काठमाडौं : अमेरिका र इरानबीचको तनाव चरम उत्कर्षमा पुगेको छ। बुधबार साँझ अमेरिकाले इरानका विभिन्न सैन्य ठेगानाहरूलाई निशाना बनाउँदै नयाँ हवाई आक्रमण गरेको छ। आक्रमण लगतै अमेरिकी राष्ट्रपति डोनाल्ड ट्रम्पले तेहरानलाई 'राम्रो व्यवहार गर्न' चेतावनी दिएका छन्।
अमेरिकी सेन्ट्रल कमान्ड (सेन्टकम) का अनुसार यस नयाँ आक्रमणका क्रममा इरानका सैन्य कमान्ड सेन्टर, हवाई प्रतिरक्षा ठेगाना, मिसाइल तथा ड्रोन केन्द्र र तटीय निगरानी केन्द्रहरूलाई निशाना बनाइएको छ। अमेरिकी सेनाले हालका लागि यी आक्रमणहरू समाप्त भइसकेको जनाएको छ।
अमेरिकाका अनुसार यस आक्रमणको मुख्य उद्देश्य हर्मुज स्ट्रेटबाट जाने व्यापारिक जहाज र तिनका चालक दलका सदस्यहरूलाई खतरा पुर्याउन सक्ने इरानको क्षमतालाई नष्ट गर्नु हो।
इरानले बहराइन र कुवेतमा रहेका अमेरिकी सैन्य ठेगानाहरूमाथि आक्रमण गरेको दाबी गरेलगत्तै अमेरिकाको यो कदम बाहिर आएको हो। यसैबीच, इरानका मुख्य वार्ताकार एवं संसदका सभामुख मोहम्मद बगेर गालिबाफले सरकारी सञ्चारमाध्यमलाई प्रतिक्रिया दिँदै यदि सम्झौताबाट कुनै फाइदा हुँदैन भने इरानले त्यसलाई मानिरहनुपर्ने कुनै कारण नभएको बताएका छन्।
यसअघि, राष्ट्रपति ट्रम्पले मंगलबार धम्की दिँदै यदि इरान अर्को साता वार्तामा नफर्किएमा त्यहाँका पुल र ऊर्जा केन्द्रहरूमा आक्रमण गरिने बताएका थिए।
प्रतिक्रिया दिनुहोस !
