धनकुटा : १५ औं संस्करणको सहिद भीमनारायण गोल्डकप आगामी वैशाख २७ गतेदेखि हुने भएको छ।
आयोजक सहिद भीमनारायण स्मृति प्रतिष्ठानले पत्रकार सम्मेलनको आयोजना गर्दै वैशाख २७ देखि जेष्ठ २ गतेसम्म सहिद भीमनारायण गोल्डकप हुन लागेको जानकारी दिएको हो।
प्रतियोगिता तीन वर्षपछि हुन लागेको हो। कोरोना महामारीको कारण प्रतियोगिता तीन वर्ष स्थगित भएको थियो।
तीन वर्षअघि सशस्त्र प्रहरी बल (एपिएफ)ले जितेको थियो। धनकुटा सदरमुकामस्थित तल्लो टुँडिखेलमा हुने प्रतियोगितामा आयोजक धनकुटासहित पेमा युवा क्लब विराटनगर, प्लानिङ ब्वाइज क्लब काठमाडौं, कञ्जनजंघा फुटबल क्लब सिलिगुडी भारत, राष्ट्रिय जागृति फुटबल क्लब सुनसरी, झापा फुटबल क्लब झापा, सशस्त्र प्रहरी वल (एपिएफ), काठमाडौं, विरगञ्ज युनाइटेड, विरगञ्ज गरि ८ टिमको सहभागिता रहने संयोजक शम्भु प्रधानले बताए।
यसपटक पुरस्कार राशीमा वृद्धि गरिएको छ। १४ औं संस्करणको विजेताले ४ लाख र उपविजेताले २ लाख रुपैयाँ पाएको थियो। यो पटकको १५ औं संस्करणको विजेताले नगद ५ लाख सहित ट्रफी र उपविजेताले दुई लाख ५० हजार हात पार्नेछ।
हरेक खेलमा म्यान अफ दी म्याच बापत ३ हजार रुपैयाँ पुरस्कारको व्यवस्था गरिएको छ। विधागत तर्फका उत्कृष्ट खेलाडीहरूलाई पाँच हजार रुपैयाँ पुरस्कार प्रदान गरिने छ।
प्रतियोगिता सञ्चालनका लागि ४१ लाख ५० हजार रुपैयाँ बजेट विनियोजन गरिएको छ। प्रतियोगिताको मुख्य प्रायोजक जगशक्ति स्टिल, सहप्रायोजकका रूपमा रेडवुल, जीवन विकास लद्युवित्त वित्तीय संस्था लि, टुर्वोग वियर, निगाले सिमेन्ट रहेको छ।
त्यस्तै मुख्य सहयोगीका रूपमा धनकुटा नगरपालिका, पाख्रिवास नगरपालिका, महालक्ष्मी नगरपालिका, साँगुरीगढी गाउँपालिका, छथरजोरपाटी गाउँपालिका, सहिदभूमि गाउँपालिका, चौविसे गाउँपालिका, धनकुटा फुटबल संघ, प्रदेश खेलकुद विकास बोर्ड, विराटनगर, अखिल नेपाल फुटबल संघ, जिल्ला खेलकुद विकास समिति र धनकुटा नगपालिकाका १० वटा वडा रहेका छन्।
२०५५ सालमा स्थापित गोल्डकप सुरुका दुई वर्ष नियमित रुपमा सञ्चालन भएको थियो। त्यसपछि देशको तत्कालीन असहज परिस्थतिका कारण सञ्चालन हुन सकेन। २०६३ सालपछि गोल्डकप बर्सेनि सञ्चालन हुँदै आइरहेको छ।
नेपाल कांग्रेसका नेता सहिद भीमनारायण श्रेष्ठलाई विराटनगरमा राजा वीरेन्द्रलाई बम हानेको आरोपमा पक्राउ गरी २०३५ सालमा तत्कालीन सरकारले गोली हानी हत्या गरेको थियो। उनलाई तत्कालीन सरकारले २०७३ सालमा राष्ट्रिय सहिद घोषणा गरेको थियो।
प्रतिक्रिया दिनुहोस !
