साउदी : नेपालबाट साउदी अरेबियाको रियाद जाँदा रामेछापकी हर्ककुमारी नगरकोटीको लगेजबाटै सुनका गरगहना हराएका छन् । बुधबार काठमाडौं त्रिभुवन अन्तर्राष्ट्रिय विमानस्थलबाट हिमालयन एयरलाइन्सको (एच०५७३०) सिधा उडानबाट साउदी आएकी नगरकोटीको दुईवटा लगेजमध्ये एउटा लगेजबाट सुन चोरिएको उनले बताइन्।
ताला लगाएको लगेजबाट एक थान तिलहरी र एक थान ब्रासलेट चोरी भएको छ भने अन्य सामान यथावत रहेको अन्नपूर्णसँग उनले बताइन्।
त्रिभुवन अन्तर्राष्ट्रिय विमानस्थलमा लगेज जिम्मा लगाएपछि साउदी पुगेर हेर्दा लगेज खोलिएको थाहा पाएको उनले बताइन्। पछि लगेज खोलेर हेर्दा सुन चोरी भएको र लगत्तै त्रिभुवन विमानस्थलमा फोन गर्दा आफूहरूको जिम्मा नभएको र सम्बन्धित एयरलाइन्ससँग बुझ्न आग्रह गरेको बताइन् ।
साउदीको एक हस्पिटलमा काम गर्ने नगरकोटी छुट्टी मनाएर साउदी जान लाग्दा साथीको अनुरोधमा सुन लिएर गएकी थिइन् । हराएको सुन खोजी गर्न सम्बन्धित निकायलाई सहयोग गरिदिन अनुरोध समेत गरेकी छन्।
प्रतिक्रिया दिनुहोस !
