बागलुङ : बागलुङमा लम्पी स्किन रोगको प्रकोप व्यापक रुपमा देखिएको छ । भेटेरिनरी अस्पताल तथा पशु सेवा विज्ञ केन्द्र बागलुङका अनुसार जिल्लाका १० वटै पालिकामा लम्पी स्किन रोग फैलिँदा असार २५ गतेसम्म १६६ गाईभैंसी मरेका छन् ।
भेटेरिनरी अस्पताल तथा पशु सेवा विज्ञ केन्द्र बागलुङका प्रमुख डा. ऋषि सापकोटाले बागलुङमा बैशाख १२ गतेदेखि लम्पी स्किन रोगको प्रकोप देखा परेको र २ हजार ९ सय १२ गाईभैसीमा समस्या देखिएको बताए । उनले प्रकोप लागेका गाईभैसीमा मृत्युदर ५.७ प्रतिशत रहेको र भैसीमा २.३ प्रतिशत संक्रमण दर रहेको बताए ।
कार्यालयले उपलब्ध गराएको विवरणअनुसार बागलुङमा सबैभन्दा धेरै संक्रमण र मृत्यु ढोरपाटन नगरपालिका र कम ताराखोला गाउँपालिकामा देखा परेको छ । ढोरपाटन नगरपालिकामा एक हजार २ सय पशुमा रोगको संक्रमण देखापर्दा ६० वटा मरेको र ताराखोला गाउँपालिकामा १३ पशुमा संक्रमण देखापर्दा एक वटाको मरेको प्रमुख सापकोटाले बताए ।
निसीखोला गाउँपालिकामा ५ सय १३ पशुमा संक्रमण देखिँदा २५ को मृत्यु भएको छ भने जैमिनी नगरपालिकामा ३ सय पशुमा संक्रमण देखिँदा ३५ पशु मरेका छन् । यस्तै बागलुङ नगरपालिकामा २ सय २१ पशुमा संक्रमण देखिँदा ५ पशु मरेका छन् भने तमानखोला गाउँपालिकामा १ सय ८९ पशुमा संक्रमण देखिँदा ५ पशु मरेका छन् ।
त्यसैगरी बडिगाड गाउँपालिकामा १ सय ८१ पशुमा संक्रमण देखिँदा ५ पशुको मृत्यु, गलकोट नगरपालिकामा १ सय ४२ पशुमा संक्रमण देखिँदा ४ पशुको मृत्यु, बरेङ गाउँपालिकामा एक सय पशुमा संक्रमण देखिँदा ५ पशुको मृत्युभएको छभने काठेखोला गाउँपालिकामा ४५ पशुमा संक्रमण देखिँदा २ पशुको मृत्यु भएको प्रमुख सापकोटाले बताए ।
भेटेरिनरी अस्पताल तथा पशु सेवा विज्ञ केन्द्र बागलुङका प्रमुख सापकोटाले रोगी पशुको खोज तथा उपचार सबै स्थानीय तहको पशु सेवा शाखाबाट भएको र भेटेरीनरी अस्पतालबाट आवश्यक प्राविधिक परामर्श तथा आवश्यक भएको स्थानमा औषधिको व्यवस्था गरिएको बताए । उनले रोगको संक्रमणको रोकथामका लागि पशुमा खोप लागाउन सुरु भएको जानकारी दिए ।
प्रमुख सापकोटाका अनुसार बागलुङमा स्थानीय तह र कृषकहरुले खरिद गरेर एक हजार एक सय र भेटेरिनरी अस्पताल तथा पशु सेवा विज्ञ केन्द्रको सहयोगमा ८ सय ७५ पशुमा खोप लगाइसकिएको बताए । उनले केन्द्रबाट ४ हजार ५ सय डोज खोप स्थानीय तहलाई उपलब्ध गराइएको र स्थानीय तहका पशु सेवा शाखाबाट खोप लगाउन सुरु भइसकेको जानकारी दिए ।
प्रतिक्रिया दिनुहोस !
