आम नागरिकमा हुनुपर्ने राजनीतिक चेतना मसँग छ : स्वस्तिमा खड्का

काठमाडौं : अभिनेत्री स्वस्तिमा खड्काले अभिनय गरेको चलचित्र ‘ऐँचो पैँचो’ राजनीतिक पृष्ठभूमिमा तयार गरिएको छ। उद्दले यस चलचित्रमा राजनीतिज्ञको भूमिका निर्वाह गरेकी छन्।

राजनीतिलाई पेसा बनाउनेप्रति व्यङ्ग्य गर्ने प्रवृत्ति रहेको भन्दै खड्काले चलचित्रले उठाएको विषयवस्तु समाजसँग जोडिएको बताइन्। उनले भनिन्, 'एउटा आम नागरिकले राजनीतिबारे राख्नुपर्ने ज्ञान मसँग छ। कलेज जीवनमा नै यसलाई नजिकबाट नियालेकाले यससम्बन्धी केही ज्ञान छ।' उनले आफू कुनै पार्टीको विचारसँग नभई केही व्यक्तिसँग प्रभावित रहेको बताइन्।

सामाजिक विषयको चलचित्रमा देखिँदै आएकी अभिनेत्री खड्काले आफू अभिनित चलचित्र ‘ऐँचो पैँचो’ पूर्णरूपमा व्यावसायिक रहेको बताइन्। आफूले अभिनय गरिरहेका चलचित्र एकै विधाका भएकाले यसपटक दर्शकले फरकरूपमा पाउने उनको भनाइ थियो। उनले थपिन्, 'मैले कलाकात्मक चलचित्रमा केही समय अभिनय गरेँ। यो पूर्णरूपमा व्यावसायिक हो। त्यसैले यो मेरा लागि महत्वपूर्ण छ।' फिल्मलाई कृषा चौलागाईँले निर्देशन गरेकी छन्।