सुर्खेत : मदन भण्डारी राजमार्गअन्तर्गत सुर्खेत खण्डमा स्तरोन्नतिको काम भइरहेको छ । तर जिल्लाको पूर्वी खण्डमा धमाधम काम भइरहे पनि पश्चिम खण्डमा भने सडक निर्माणमा कठिनाइ भइरहेको छ । रुख कटानको अनुमति नआउँदा सडक निर्माणमा समस्या भएको हो ।
मदन भण्डारी राजमार्गअन्तर्गत सुर्खेतको पश्चिम क्षेत्रमा बड्डीचौरदेखि बल्देसम्म ४५ किलोमिटर सडकको स्तरोन्नति हुँदैछ । उक्त खण्डको अधिकांश क्षेत्रमा जंगल पर्ने भएकाले सडक विस्तार गर्दा रुख काट्नुपर्ने बाध्यता छ ।
तर, संघीय मन्त्रिपरिषद्बाट रुख काट्ने अनुमति नपाउँदा सडकको स्तरोन्नतिमा कठिनाइन भइरहेको मदन भण्डारी राजमार्ग आयोजना कार्यालय सुर्खेतले जनाएको छ । रुख कटानको अनुमति नपाएपछि हाल सडकमा पर्ने रुखहरु छोड्दै सडक खन्ने कामलाई निरन्तरता दिइएको छ ।
वीरेन्द्रनगरबाट जिल्लाको पश्चिम क्षेत्रलाई जोड्ने यो सडकको हालसम्म स्तरोन्नति नहुँदा त्यस क्षेत्रका बासिन्दाले सास्ती भोग्दै आएका छन् । तर पछिल्लो समय मदन भण्डारी राजमार्ग अन्तर्गत यो सडक खण्ड परेपछि स्तरोन्नति गर्न थालिएको छ । ट्रयाक खुलेको २९ बर्षपछि स्तरोन्नतिको प्रक्रिया अगाडि बढ्दा स्थानीयहरु हर्षित बनेका छन् । तर, संघीय सरकारले रुख काट्ने अनुमति नदिदा सडक निर्माणले गति नलिएपछि समयमै काम सम्पन्न नहुने आशंका बढेको छ । पश्चिम खण्डमा सडकको स्तरोन्नति गर्न तीन खण्डमा विभाजन गरिएको छ ।
जसअन्तर्गत बड्डीचौरदेखि खम्बागाडेसम्म १३ किलोमिटर खण्ड पर्दछ । त्यसमा ७ किलोमिटर जंगल क्षेत्र छ । समयमा रूख कटानको आदेश नआउदाँ काममा ढिलाइ भइरहेको हो । रुख कटान नहुँदा सडक विस्तारमा अवरोध भए पनि हाल उक्त खण्डमा नाला, ग्याबिन, कल्भर्ट लगायतका काम भने भइरहेको छ ।
यस्तै विद्यापुरदेखि बल्देसम्मको सडक खण्ड २२ किलोमिटर लामो छ । यो खण्डको आईईई स्वीकृत भइसकेको छ । तर यो खण्डमा पनि रुख कटान आदेशका लागि वन मन्त्रालयमा फाइल पठाइको भएपनि अनुमति आएको छैन । राजमार्गको विस्तार हुने क्षेत्रमा पर्ने रुखको कटानका लागि अनुमति नपाउँदा कामको गतिमा अलमल भइरहेको मदन मण्डारी राजमार्ग आयोजना कार्यालय सुर्खेतले जनाएको छ ।
आयोजना कार्यालय सुर्खेतका प्रमुख शम्भुप्रसाद आचार्य भन्छन्,‘सुर्खेतको पूर्वी खण्डमा पहिले नै रुख कटानको अनुमति पाएकाले त्यहाँ धमाधम काम भइरहेको छ,तर पश्चिम खण्डमा भने रुख कटानका लागि मन्त्रालयमा फाइल गइसकेको छ । तर हालसम्म कटानको अनुमति आएको छैन, रुख काट्ने अनुमति नआउँदा सडकको बिचमा पर्ने रुखलाई छोड्दै सडक खन्ने काम भइरहेको छ ।’
हाल यो खण्डमा सडकको ट्रयाक खोल्ने र चौडा बनाउने काम भइरहेको छ । अब रुख कटानको कानुनी प्रक्रिया पूरा भएपछि विस्तृत काम अघि बढ्ने र निर्माणको कामले पनि गति लिने आयोजना कार्यालयले जनाइएको छ । विभाजन गरिएका तीन वटा खण्ड मध्ये दुई वटा खण्डमा मदन भण्डारी राजमार्ग आयोजना र एक खण्डमा कर्णाली प्रदेश सरकारले काम गर्दैछन् ।
रुख कटानको आदेश आएमा तोकिएकै मितिमा निर्माणको काम सक्ने आयोजनाको दाबी छ । यस्तै खम्बागाडेदेखि विद्यापुरसम्मको १० किलोमिटर सडक खण्ड हो । तर हाल यो सडक खण्डको काम भने अघि बढ्न सकेको छैन ।
यसैबीच यो सडक खण्डमा भइरहेको कामको अनुगमन गर्दै भौतिक पूर्वाधार तथा यातायात राज्यमन्त्री नन्दा चपाईंले सडक निर्माणमा देखिएका जटिलता हटाउन पहल गर्ने बताइन् । रुख कटानका लागि आफूले सरकारमा पहल गर्ने प्रतिबद्धतासमेत उनले जनाइन् । रुखकै कारण राजमार्गको काममा अवरोध हुन नहुने भन्दै उनले यो खण्डको काम सम्पन्न भएमा पश्चिम क्षेत्रका नागरिकले भोग्दै आएको समस्या अन्त्य हुने बताइन् ।
प्रतिक्रिया दिनुहोस !
