फिदिम : पछिल्लो समयमा सांगीतिक क्षेत्रको चम्किलो ताराको रुपमा उदाएकी एलिना चौहान प्रेम र बिछोडका गीतहरु गाएर चर्चाको शिखरमा छिन् । उनले गाएका बियोगान्त गीतहरुलाई युवा पुस्ताले औधी रुचाएका छन् ।
सांगीतिक प्रस्तुतिका लागि पहिलोपटक पाँचथरको जेभाले आएकी एलिनाले गीत गाउँदै दर्शकहरुलाई प्रेमको पाठ समेत पढाउन भ्याइन् । झमक्क साँझ परेपछि स्टेज उक्लिएकी एलिनालाई हजारौँ दर्शकहरुले हुटिङ र तालिको पर्राले साथ दिए ।
स्टेजमा एलिनाको आगमनसँगै जेभालेको चिसो मौसम गर्माउन थालेको थियो । प्रस्तुतिको सुरुवातमै एलिनाले भनिन्, ‘मेरा गीतहरु प्रेम प्रस्ताव राख्दादेखि धोका खाएसम्मका छन् । सबै गीतहरु तपाईंहरुलाई सुनाउँछु ।’
एलिनाले प्रेमदेखि बिछोडसम्मका सबै गीतहरु गाउँछु भनेपछि दर्शकहरुले जमिन थर्कनेगरी हुटिङ गरे । उनले प्रपोज हान्दा, लभ पर्दा, धोका दिँदा र त्यसपछिका घटनाक्रमसँग तुलना गर्दै आधा दर्जन गीत गाइन् ।
उनले के माया लाग्छ र ?, तिम्रो मायाले बाँधेर राख, ए है तिम्रै माया लाग्छ बरीलै, यो भाग्यमा खोट छ, धोकेबाज हौ तिमी, तुङ्नाको धुनमा, मिनरल वाटर लगायतका गीतहरु गाएर दर्शकहरुलाई झुमाइन् । स्टेजमा रहेका अतिथिहरु पनि एलिनाको प्रस्तुतिसँगै झुमेका थिए ।
दशमी मेला २०८० को अवसरमा फिदिम नगरपालिका- १३ जेभालेस्थित पञ्मीभञ्ज्याङमा सांगीतिक कार्यक्रमको आयोजना गरिएको हो ।
प्रतिक्रिया दिनुहोस !
