हेटौंडा : मकवानपुरमा पछिल्लो समय क्रिकेट खेलप्रति आर्कषण बढ्दै गरेको पाइएको छ । गत वैशाखबाट सञ्चालनमा आएको मकवानपुर क्रिकेट एकेडेमीमा दैनिक रूपमा क्रिकेट सिक्न आउने खेलाडीको चाप बढ्दो रूपमा रहेको पाइएको हो ।
हेटौंडा–४ स्थित हुप्रचौरमा दैनिक रूपमा क्रिकेट खेल सिक्नकै लागि विद्यालयस्तरका सहित भरखरै क्याम्पस पढ्दै गरेका करिब २५-३० जना प्रशिक्षार्थीहरू आउने गरेको एकेडेमीका प्रशिक्षक तक्षक सिम्खडाले बताए । उनले भने,'नेपाली खेलकुद जगतमा क्रिकेट खेलको त्यति लामो इतिहास छैन।'
यद्यपि पछिल्लो समय अन्तराष्ट्रिय प्रतियोगिताहरूमा नेपालले गरेको प्रदर्शनीले स्थानीय स्तरमा समेत खेलप्रति आर्कषण बढेको महशुस भएको छ । विद्यालय स्तरदेखि क्याम्पस पढदै गरेका विद्यार्थीहरू क्रिकेट खेलबारे सिक्न आउने क्रम बढ्दो रूपमा रहेको छ ।
एकेडेमीमा क्रिकेट सिक्न आउने नयाँ खेलाडीका लागि ३ हजार रुपैयाँ भर्ना शुल्क र मासिक शुल्क १५ सय मात्र राखेर सिकाइ रहेको उनले बताए । उमेरले २७ वर्ष लागेका एकेडेमीका प्रशिक्षक सिम्खडा आफैं पनि स्वम क्रिकेट खेलाडी हुन् ।
विद्यालयस्तरबाटै क्रिकेट खेल्न सुरु गरेका उनले स्थानीय र क्षेत्रीय स्तरका प्रतियोगितासहित ९ औं राष्ट्रिय खेलकुद प्रतियोगिता,प्रदेशस्तरीय,राष्ट्रपति कप, प्रधानमन्त्री कप लगायतका विभिन्न प्रतियोगितामा सहभागी भएका थिए ।
अहिले सिम्खडा आफूले क्रिकेट खेलमा जानेको ज्ञान र सिपलाई प्रयोग गर्दे एकेडेमीमार्फत् नयाँ खेलाडी उत्पादन गर्नमा व्यस्त छन्।
प्रतिक्रिया दिनुहोस !
