नेपालगन्ज : भूकम्पमा घाइते भएका जाजरकोट र रुकुम पश्चिमका ३२ जनाको बाँकेमा उपचार भइरहेको छ। भेरी अस्पताल नेपालगन्जमा ३२ जना र नेपालगन्ज मेडिकल कलेज शिक्षण अस्पताल कोहलपुरमा एक जनाको उपचार भइरहेको छ।
शुक्रबार जाजरकोटको रामीडाँडा केन्द्रबिन्दु बनाएर गएको भूकम्पमा परी घाइते भएका जाजरकोट र रुकुम पश्चिमका ३३ जनामध्ये एक जनाको ज्यान गएको हो। हेलिकप्टरबाट उद्धार गरिएका जाजरकोटको नलगाड-१ पालीका घाइते ३३ वर्षीय टेकबहादुर पुनलाई भेरी अस्पतालमा शनिबार मध्यान्न १२ चिकित्सकले मृतक घोषणा गरेका थिए। उपचारमा ल्याउँदा ल्याउँदै बाटोमै मृत्यु भएको बाँकेका प्रमुख जिल्ला अधिकारी श्रवणकुमार पोखरेलले बताए।
भूकम्प प्रभावित क्षेत्रबाट रिफर भएका घाइतेहरूको डेडिकेट अस्पताल बनाएकाले भेरीमा अहिले जाजरकोटका २७ र रुकुम पश्चिमका ६ जनाको उपचार भइरहेको छ। जसमा महिला १६ र पुरुष १७ जना छन्। १८ वर्ष मुनीका ९ जना, ६० वर्षमाथिका ५ जना रहेको भेरी अस्पतालका प्रमुख मेडिकल सुपरिटेन्डेन्ट डा. पवनजंग रायमाझीले जानकारी दिए।
लायन्स क्लब इन्टरनेशनल डिष्ट्रिक ३२५एनका गर्भनर मुकुट ढकाल नेतृत्वको टोली पाँच लाख रुपैयाँ बराबरको खाद्यान्न र आवश्यक सामग्री लिएर वितरणका लागि शनिबार अपरान्ह जाजरकोट गएको छ। त्यसैगरी नेपालगन्ज उद्योग वाणिज्य संघको टोलीले पनि साढे तीन लाख रुपैयाँ बराबरको तत्काल राहातका सामग्री र कपडा वितरण गर्न जाजरकोट र रुकुम पश्चिम प्रस्थान गरेको संघका महासचिव भीमबहादुर रानाभाटले जानकारी दिए।
संघले भेरी अस्पतालमा उपचार गराइरहेका घाइतेहरूलाई कपडा वितरण गरेका छन्। नेकपा (एमाले), अनेरास्ववियु, रेडक्रस, नागरिक समाजले घाइतेलाई आवश्यक पर्ने भन्दै रक्तदान गरेर सहयोग गरेका छन्। n
प्रतिक्रिया दिनुहोस !
