डाक्टर कुटपिटपछि आम्दा हस्पिटलमा सेवा ठप्प, घटनामा संलग्न ७ जना प्रक्राउ

बुटवल : सुत्केरीको मृत्युपछि आक्रोशित आफन्तहरुले डाक्टरलाई कुटपिट गरेपछि बुटवलको सिद्धार्थ महिला तथा बाल अस्पताल (आम्दा)मा बुधबार आकस्मिक बाहेकको सेवा ठप्प पारिएको छ । अस्पतालमा भर्ना भएका बिरामीहरु बाहेक नयाँ बिरामीहरुको उपचार गरिएको छैन। 

अस्पतालका मेडिकल सुपरिटेन्डेन्ट डाक्टर राजेन्द्र बस्याललाई छलफल चलिरहेका बेला अस्पताल परिसरमै मृतकका आफन्तहरुले कुटपिट गरेका थिए । मंगलबार गुल्मीको सत्यवती गाउँपालिका-३ ठूलोलुम्पेककी ३५ वर्षीया भवानी रास्कोटीको मृत्यु भएको थियो । बच्चा सकुशल जन्मिए पनि आमाको केही समयपछि मृत्यु भएको हो । 

कुटपिटपछि घाइते डाक्टरको लुम्बिनी प्रादेशिक अस्पतालको आइसियूमा उपचार चलिरहेको छ । नेपाल चिकित्सक संघले दोषीलाई तत्काल पक्राउ गरी कानुन अनुसार कारवाहीको माग गरेको छ । 

प्रहरीकै अगाडि कुटपिट गर्नु जघन्य अपराध भएको चिकित्सक संघले विज्ञप्ती मार्फत भनेको छ । दोषीलाई उनमूक्ति नदिन संघका महासचिव एवं आम्दा अस्पतालका वरिष्ठ बालरोग विशेषज्ञ डाक्टर सन्तोष पोखरेलले बताए । 

घटनामा संलग्न सात जनालाई नियन्त्रणमा लिएर अनुसन्धान थालिएको इलाका प्रहरी कार्यालय बुटवलका प्रहरी नायव उपरीक्षक दान बहादुर थापाले जानकारी दिए ।