प्रहरीले कारबाही नगरी छाडेका युवकको समूहले फेरि भित्रायो भन्सार छलेर कपडा

झापा : वडा प्रहरी कार्यालय भद्रपुरले तस्करीका सामानसहित पक्राउ परेका एक युवक (लाइनमेन)लाई कारबाही नगरी छाडेको भोलिपल्ट त्यही समूहले प्रहरीलाई चुनौती दिँदै फेरि भन्सार छलेर सामान भित्राएको पाइएको छ । 

वडा प्रहरी कार्यालयबाट खटिएको सादा पोशाकमा खटिएको प्रहरी टोलीले बुधबार साँझ ७ बजेतिर भद्रपुर नगरपालिका– ५ स्थित राई बस्ती नजिकैबाट लत्ताकपडा बरामद गरेको हो । नेपाल- भारत सीमा पिलर ९९ बाट भन्सार छलेर ल्याएको चार पोका कपडा घरभित्र भित्र्याउनै लाग्दा प्रहरीले बरामद गरेको जिल्ला प्रहरी कार्यालय झापाले जनाएको छ । 

बरामद गरिएका ३० थान साडी ,१६ थान झुल, ४९० पिस राधेराधे लेखिएको गम्छा, ४१ थान पण्डाल र पर्दाको कपडा गरी अन्दाजी ७० हजार मुल्य बराबरको सामान रहेको प्रहरीले जनाएको छ । बरामद गरिएका लत्ताकपडा भद्रपुर भन्सार कार्यालय बुझाउने तयारी भइरहेको जनाइएको छ ।  

सादा पोशाकको प्रहरी टोलीले मंगलबार साँझ अन्दाजी ७ बजेतिर त्यही नाकाबाट भन्सार छलेर सामान ओसार्ने भद्रपुर नगरपालिका– ५ का एक्का भन्ने आकाश कामतीलाई पक्राउ गरेको थियो। लाइन मेन कामतीको समूहले ५० हजार मूल्य बराबरको एसियन पेन्ट्सको १६ कार्टुन इनामेल,थ्रीनर र प्राइमर भन्सार छलेर भित्र्याउन लाग्दा प्रहरीले सामानसहित कामतीलाई पक्राउ गरेको थियो।  

तर,वडा प्रहरी कार्यालय भद्रपुरका इन्स्पेक्टर सञ्जीव बोगटीले दबाब र प्रभावमा परेर सामानसहित पक्राउ परेका कामतीलाई राति नै छाडिदिएका थिए। पक्राउ परेका मान्छेलाई आइन्दा यस्तो गल्ती नदोहोर्‍याउने सर्तमा मंगलबार राति आफन्तजनलाई बोलाएर जिम्मा लगाएको वडा प्रहरीका इन्स्पेक्टर  बोगटीले बताएका थिए । 

तर,इन्स्पेक्टर बोगटीले छाडेको कामती समूहले उल्टै इन्स्पेक्टरलाई चुनौती दिँदै भोलिपल्टै फेरि सामान तस्करीको माध्यमबाट नेपाल भित्रायो । भद्रपुर–५ स्थित ९९ पिलर आसपास दोभान नाकाबाट भन्सार छलेर ठूलो मात्रामा सरसामान नेपाल भित्रिरहेको छ ।