भैरहवा : भैरहवा भन्सार कार्यालयले बेलहिया नाकाबाट टुथपेस्टले भरिएको ट्रक नियन्त्रणमा लिएको छ। भारतीय नम्बरको ट्रकमा युनिलिभर कम्पनीको दुई सय नब्बे कार्टुन टुथपेस्ट कागजपत्रविना नेपालबाट भारत जान लागेको सूचना प्राप्त भएपछि ट्रकलाई नाका (भन्सार गेट)बाट नियन्त्रणमा लिइएको भैरहवा भन्सार कार्यालयका प्रमुख नारद गौतमले जानकारी दिए। उनले ट्रकका चालक फरार भएकोले खोजी कार्य भइरहेको बताए।
बरामद टुथपेस्ट अन्दाजी २० लाख रुपैयाँ मूल्य बराबरको रहेको र घटनाको अनुसन्धान भइरहेको भन्सार कार्यालयले जनाएको छ। 'नेपालको कहाँबाट आएको र विना कागजपत्र भारतको कुन ठाउँमा जाँदै थियो ? कसले निर्यात गर्दै थियो ? लगायत विषय अहिले खुलेको छैन' उनले अन्नपूर्ण पोष्टसँग भने, 'ट्रक र सामग्री नियन्त्रणमा लिएर घटनाको अनुसन्धान गरिरहेका छौँ, थप विषयहरू खुल्दै जानेछन्।'
प्रतिक्रिया दिनुहोस !
